30. 5. 2019: 80-роча Народного умелця Україны Івана Бровдія

Іван Бровдій нар. 2. юна 1939 в Оноку, Підкарпатьскій теріторії Мадярії, днесь теріторія Україны. Він є малярём (позн. ред.: в тім жанрї творить вєдно з менжелков Ларисов) і скулптором русиньской народной орьєнтації на Підкарпатю.

По скінчіню штудій  у середнїй школї у Великых Комятах (1952 – 1955) І. Бровді учіть ся в Учіліщу вытварного уменя в Ужгородї (1956 – 1961). Од того часу  зробив значне множество монументалных робот, бронзовых і деревяных рельєфів про намістя і будовы на Підкарпатю. Многы з тых зображують темы русиньской історії і културы, в тім чіслї алеґорічна робота Сын і вір (1978) при Синевірьскім озерї на Верховинї, Архітект (1980) про Закарпатьскый етноґрафічный музей під голым небом в Ужгородї; серія штырёх барельєфів Історія Мукачова (1986) у дворї школы уменя; деревяный рельєфный портрет Анґустина Волошина (1998) і монументална бронзова композіція постав славяньскых учітелїв св. Кіріла і Мефодія (1999), яка прикрашать головне намістя Мукачова. За умелецькы успіхы быв  оцїненый Преміёв А. Ерделі і О. Бокшая (1998) і званём Заслуженый умелець Україны (1999). (Позн. ред.: пізнїше званём Народный умелець Україны).

Павел Роберт МАҐОЧІЙ, здрой: „Енциклопедія історії та культури карпатських русинів‟ зоставителїв П. Р. Маґочія і І. Попа, (Ужгород: „Видавництво В. Падяка‟, 2010, на с. 71), переклад і звыразнїня писма: А. З.