30. 6. 2024: Народностный выбор кінчіть. Меншыны дістануть окрему Раду влады

Посланцї Народной рады Словацькой републікы в четверь, 27-го юна 2024-го року, схвалили зміны в компетенчнім законї. Новелізація закона значіть зміну і про народностны меншыны.

Подля новой леґіслатівы скінчіть своє дїятельство Выбор про народностны меншыны і етнічны ґрупы Рады влады Словацькой републікы про людьскы права, народностны меншыны і родову рівность. Намісто нёго выникне в септембрї Рада влады Словацькой републікы про народностны меншыны.

Так само будуть установлены уповномоченый влады СР про народностны меншыны і уповномоченый влады СР про ромскы комуніты як сталы уповномочены.

Уряд влады СР буде подля схваленой пропозіції централным орґаном державной справы про творіня у реалізацію державной політікы а коордінацію повнїня задач в области прав народностных меншын. Ту треба додати, же тота зміна не буде дотуляти ся областей народностных політік, котры має в компетенції Міністерство културы СР або і Міністерство школства.

Окрема Рада влады СР про народностны меншыны бы мала значіти посилнїня прав меншын. Покля меншыновый выбор быв лем порадным орґаном Рады влады Словацькой републікы про людьскы права, народностны меншыны і родову рівность, причім рада є порадным орґаном влады, теперь будуть меншыны посередництвом рады прямым порадным орґаном влады.

„В септембрі заникне Выбор про народностны меншыны і выникне нова Рада влады СР про народностны меншыны, котра буде мати силнішы компетенції,“ написав на офіціалнім сайтї на сітї Facebook уповномоченый влады СР про народностны меншыны Акош Горонь.

Подля єго слов є цїлём принести міцнїшый голос меншын і ефектівніше творїня публічной політікы. „В повязаню з тым приходить і ку сімболічному посилнїню моёй функції, кедьже вєдно із уповномоченым про ромскы комуніты зо закона стаєме ся постоянныма уповномоченыма влады,“ написав Горонь.

Припоминаме, же до 2010-го року існовала окрема Рада влады СР про народностны меншыны. Втогдышнёв змінов компетечного закона тота рада заникла, і выникла Рада влады СР про людьскы права, народностны меншыны і родову рівность. В повязаню з тым пак од 2011-го року почав існовати Выбор про народностны меншыны і етнічны ґрупы.

Покля не дішло ку змінам компетенчного закона у 2010-ім роцї, меншыны не мали уповномоченого, але підпредседу влады про народностны меншыны, значіть міцнїшу позіцію. Новелізація закона теперь зохаблять уповномоченого.

Створіня Рады влады Словацькой републікы про народностны меншыны владный кабінет Роберта Фіца приобіцяв на своїм выїздовім засїданю в Ґалантї на кінцю марца того року. Там членове влады і коалічных партій мали переговоры з представителями партії Magyar Szövetség – Maďarská aliancia, котра пак підпорила посередництвом свого председы в другім колї презідентьскых волеб коалічного кандідата і сучасного презідента Петра Пеллеґріні.

Послїднє засїданя Выбору про народностны меншыны і етнічны ґрупы одбуде ся 2-го юла в Братїславі.

Петро МЕДВІДЬ, ЛЕМ.фм, языкова і ґрафічна управа: АРК в СР.