30. 6. 2026: В Ужгородї праздновали перенесїня мощей блаженого священомученика Теодора

Як інфомровав сайт Мукачовской ґрекокатолицькой єпархії на сітї Facebook, в недїлю, 28-го юна 2026-го року в Ужгородьскій ґрекокатолицькой богословской академії одбыла ся торжественна літурґія із нагоды 25-ой рочніцї выголошіня за блаженого священомученика Теодора Ромжу, мукачовского єпіскопа.

Гловным служытелём быв Преосвященый владыка Теодор Мацапула, мукачовскый єпарха. Вєдно з ним служыли і Преосвященый владыка Ніл Лущак, помічный мукачовскый єпіскоп, єпіскопи русиньской традіції – Высокопреосвященый владыка Філіп Кочіш, архієпіскоп і митрополіта гайдудороґскый, глава Мадярьской ґрекокатолицькой церькви, і Преосвященый владыка Мілан Лах, братіславскый єпарха.

Беатіфікація блаженого священомученика Теодора Ромжы (1911 – 1947) одбыла ся 27-го юна 2001-го року в Львові, почас навщівы Святішого Отця Йоана Павла ІІ. на Українї.

Мощі блаженого, котры были розметаны і знеучтены за влады комуністів, были загнаны на експертізу до Будапешту. У 2003-ім роцї, 28-го юна, были торжественно через Маріяповч в Мадярьску і Собранцї на Словакії перенесены до Ужгорода, де суть уложены в Хрестовоздвиженьскім катедралнім соборї. Зато ся одвтогды святкує і 28-ый юн як праздник пренесїня мощей блаженого.

Выбране зо статї Петра Медвідя, ЛЕМ.фм, фото: FB/Мукачовска ґрекокатолицька єпархія.