30. 7. 2024: Деревяна церьков у Іновці є старша, як ся думало, потвердило баданя

Пять деревяных храмів на выходній Словакії перешло шпеціалізованым дендролоґічным баданём. При церькви в Іновці здобыли даны о скорїшім выбудованю, як ся думало.

Як інформує аґентура TASR, Крайскый памятковый уряд Пряшів у сполупраці з Крайскым памятковым урядом Кошіцї помогли научным робітникам з Менделовой універзіты в Бырнї. Антон Лишка, одборный радця Крайского памяткового уряду Пряшів інформовав, же цїлём проєкту было точно датовати час будованя і ставебных реконштрукцій храмів.

На теріторії Пряшівского краю были пробаданы Євангелицькый артікуларьный костел в Кежмарку, Ґрекокатолицька церьков святого Євангелісты Лукы в Брежанах (даколи село мало назву Буяк), в окресї Пряшів, і Римокатолицькый костел Непорочного Зачатя Дївы Марії у Высокых Татрах – Старім Смоковцї.

В Кошіцькім краю одборници посмотрили ся на Ґрекокатолицьку церьков Перенесїня мощей святого Николая Чудотворця в Руській Быстрій і Ґрекокалицьку церьков святого Михаіла Архістратига в селї Іновець, обидві в окресї Собранцї.

„Дендролоґія уможнює встановити рік і пору рока здобываня дрыв, як і сорту хоснованых дрыв. Важным є, жебы баданый елемент мав підлуповый літокруг, іншак датованя є лем орьєнтачне,“ додав Лишка.

Баданя одобратых елементів проходило в Дендролоґічній лабораторії Менделовой універзіты в Бырнї, де встановлёвав ся вік стромів.

Резултаты баданя в двох із пятёх баданых обєктів потвердили датованя выбудованя так, як ся о тім пише у одборній літературї. Якы были резултаты при деревяных церьквах?

Церьков святого Євангелисты Лукы в Брежанах была збудована з яліць зрубаных по 1719-ім роцї і в роках 1722 аж 1724, што потверджує літературов писаный рік выбудованя 1727.

В припаді Церькви Перенесіня мощей святого Николая Чудотворця в Руській Быстрій, котра датує ся до 1730-го року, не подарило ся зістити вік жадного із баданых елементів конштрукції. Баданя лем потвердило, же на будованя хосновав ся ясень і береза.

Несподїваня пришло в припадї Церькви святого Михаіла Архістратига в селї Іновець, котра є літературов датована до 1836-го року. Дентролоґічне баданя потвердило, же сосны, якы хосновали ся на ёго будованя, были зрубаны в зимі на переломі років 1772 аж 1773. На будові хосновав ся далше явoр, смерека, тополя і береза.

Петро МЕДВІДЬ, ЛЕМ.фм, языкова і ґрафічна управа: АРК в СР. Фото: Henryk Bielamowicz, Wikipedia.