31. 1. 2025: У Анагеймі рукоположыли нового єпіскопа Артура Бубневіча

По семох роках має Русиньска католицька єпархія Покровы Пресвятой Богородіцї у Фініксї, Споєны штаты Америкы, нового єпархіалного єпіскопа. 28-го януара 2025-го року в Храмі Благовіщенія Пресвятій Богородіцї в Анагеймі рукоположеный і інтронізованый владыка Артур Бубневіч, новый єпарха Фінiксу.

День перед єпіскопсков хіротоніёв по вечурнї склав новый єпарха єпіскопску присягу.

Головным служытелём літурґії, почас котрой быв рукоположеный владыка Артур, быв Высокопресвященый Вілъям Скурла, піттсбурґскый архієпіскоп і митрополіта, котрый быв і головным святителём нового єпархы. Сполусвятителями были владыка Курт Бурнетт – пасаіцькый єпарха, і владыка Роберт Піпта – пармскый єпарха.

На єпіскопскій хіротонії взяли участь далшы єпіскопы і духовенство. Участны были і єпіскопы мукачовской – русиньской традіції, котрой Піттсбурґска митрополія є наслїдником, і то мукачовскый єпарха Теодор Мацапула, і Высокопреосвященый Йона Максим – пряшівскый архієпіскоп і митрополіта.

Владыка Артур Бубневіч народив ся 22-го юна 1975-го року в Перечинї, на Підкарпатю. Вступив до семінарії Мукачовской єпархії в Ужгородії і в роках 1996 аж 2001 штудовав теолоґію, наперед в Ужгородї, пізнїше на Меджінароднім теолоґічнім інштітутї про штудіум манжелства і родины в автрійскім Ґамінґу.

В роках 2006 аж 2013 быв секретарём про проєкты в канцеларії Мукачовской єпархії, і єдночасно сполупрацовав з владыком Міланом Шашіком при формованю молодежи і навчаню анґліцького языка.

В септембрї 2013-го року на запрошіня владыкы Джералда Діна, втогдышнёго єпархы Фініксу, з благословлїнём владыкы Мілана Шашіка, пішов служыти до Єпархії Фінікс. 9-го марца 2014-го року быв рукоположеный на діакона і 14-го септембра того самого року быв рукоположеный на священика.

За пароха Парохії Матери Божой Безпрестанной Помочі в Албукерке, в Новім Мексіку, быв призначеный 1-го децембра 2014-го року. Быв членом Єпархіалной рады у дїлах покликань а Меджієпархіалной комісії у дїлах молодежи.

8-го новембра 2024-го року, на праздник Собора святого Архістратига Михаіла і остатнїх безтїлесных сил, Папа Римскый Франціск призначів отця Артура Бубневіча за нового правлячого єпіскопа Єпархії Фінікс.

Наперек тому, же в Піттбурґскій митрополії є вже літурґічным языком анґліцькый язык, новый єпарха у Фініксї до свого єпіскопского ербу дав собі як мотто слова 17-го псалму по церьковнославяньскы.

Петро МЕДВІДЬ, ЛЕМ.фм, языкова і ґрафічна управа: АРКСР