31. 10. 2016: Сополиґа абдіковав

  • Будова СНМ – Музею україньской културы у Свіднику, де ёго директор Миросала Сополиґа довгы рокы офіціално „каламутив воду‟ одностно Русинів, але лем до часу ёго абдікації подля пословіцї:  „Божы млины мелють помалы, але істо‟ Жрідло фотоґрафії: vypadni.sk

    Будова СНМ – Музею україньской културы у Свіднику, де ёго директор Миросала Сополиґа довгы рокы офіціално „каламутив воду‟ одностно Русинів, але лем до часу ёго абдікації подля пословіцї: „Божы млины мелють помалы, але істо‟ Жрідло фотоґрафії: vypadni.sk

Як інформовав 28-го октобра 2016-го року председа Округлого стола Русинів Словенська Мілан Піліп (ОСРС), в тых днях дістав од нового ґенералного директора Словацького народного музею Бранїслава Паніса інформацію, же директор Словацького народного музею – Музею україньской културы у Свіднику Мірослав Сополиґа абдіковав зо своёй функції.

 

О увольнїня зо своёй функції Сополиґа пожадав ку дню 31-го октобра 2016-го року. Вєдно з тым пожадав о скінчіня робочого одношіня у свідницькім музею ку дню 31-го децембра 2016-го формов договору, з чім быв ґенералный директор Бранїіслав Паніс согласный. Паніс Піліпа інформовав на основі того, же председа ОСРС пожадав ґенералного директора о стрїчу, на котрій хотїв рїшыти заключіня конференції, котра проходила в апрілю 2016-го року в музею во Свіднику, якы были силно протирусиньскы. Паніс втогды інформовав Піліпа, же Мірослав Сополиґа є на мародцї, і стрїча ся доїднать по ёго навернутю до роботы.

 

Мілан Піліп іщі 30-го авґуста 2016-го року подав на Ґенералну прокуратуру Словацькой републікы в Братїславі голошіня о переступлїню закона. Голошіня дотуляло ся конференції, котра проходила 8-го аж 9-го апріля 2016-го року в Словацькім народнім музею – Музею україньской културы в Свіднику, яка принесла протирусиньскы заключіня. Піліп подав голошіня о переступлїню закона на незнамого переступника. Но вєдно з тым загнав і писмо втогдышнёму ґенералному директорови Словацького народного музею Вікторови Ясанёви, в котрім жадав одкликаня директора Словавького народного музею – Музею україньской културы в Свіднику. Ясань ся од резултатів конференції, якы не суть в згодї з меншыновов політіков Словацькой републікы і Словацького народного музею, діштанцовав.

Піліп подав голошіня як пріватна особа. Каждый жытель має право, а докінця обовязок, подати на прокуратуру таке голошіня, покля знать о даякім переступлїню закона. Мірослав Сополиґа нераз публічно сам выступав проти Русинів. На пресконференції 26-го децембра 2011-го року в Ужогородї бісїдовав, же русиньскый рух є лем дакілько псіхічно хворых особ, што вєдно з переписом і авдіозаписом публіковав портал zakarpattya.net.ua. Сополиґа ся од протирусиньскых заключінь апрілёвой конференції, якы не суть в згодї з народностнов політіков Словацького народного музею, ани зо словацьков леґіслатівов, котра узнавать Русинів як окрему народностну меншыну, не хотїв діштанцовати, навспак, ґенералному дирекрторови Словацького народного узею написав, же іде о науковы факты.

 

До відома Мілан Піліп загнав спомянуты матеріалы Еріцї Юріновій, председнічцї Выбору Народной рады Словацькой републікы про людьскы права і народностны меншыны, Канцеларії публічного охранцю прав (омбудсман), Міністерству загранічных дїл Словацькой републікы і Міністерству културы Словацькой републікы.

 

Посланкиня словацького парламенту Еріка Юрінова, котра председать парламентному выбору про людьскы права і народностны меншыны, зареаґовала на писмо Мілана Піліпа і 8-го септембра подала в Народній радї Словацькой републікы інтерпелацію на міністра културы Марека Мадяріча, під котрого резорт Словацькый народный музей належыть, і котрого є міністерство зряджователём.

 

„Ґенералный директор Словацького народного музею Віктор Ясань ся од заключінь конференції діштанцовав, но одностно на порушіня словацькой леґіслатівы і діяня в незгодї з меншыновов політіков на Словакії є безодкладне, жебы была встановлена повна одповідность за выникнуту сітуацію. Директор державной інштітуції, котрого задачов є робити в меджах закона, і котрый ся од документу, в котрім выражать погляд в протиречіню і незгоді з нашов леґіслатівов, не діштанцує, не мав бы на своїм місцї дале быти,“ написала втогды Юрінова.

 

Петро МЕДВІДЬ

 

Script logo