31. 3. 2021: Лавреатом літературного конкурзу став Міро Жолобаніч

У віторок, 30-го марца 2021-го року, проходило выголошіня найлїпшых творів загнаных до семого річника Літературного конкурзу Марії Мальцовской. Тогорічным лавреатом став Міро Жолобаніч.

Выголошіня першых трёх місць, але і прочітаня вшыткых загнаных творів, тот рік проходило онлайн в службі Youtube, кедьже пандемічна сітуація не доволює орґанізовати події. Онлайн подіёв проводила Кветослава Копорова, председкыня Сполку русиньскых писателїв Словеньска. Якраз тот орґанізує літературный конкурз вєдно із Академіёв русиньской културы в Словацькій републіці і Інштітутом русиньского языка і културы Пряшівской універзіты.

До конкурзу в тім річнику загнало свої творы десять авторів, з того єден новый. Реґіонално была участь подїлена так, же з окресу Стара Любовня были двоми авторы, з окресів Свідник і Строків загнали свої творы трёми, з Меджілабірського окресу так само трёми авторы, а двоми писателї были в конкурзї за окрес Снина.

На третїм місцї скінчіла тот рік Людмила Шандалова із своёв прозов про дїти. Друге місце здобыв Юрко Харитун, котрый до конкурзу традічно загнав стихы. Лавреатом семого річника Літературного конкурзу Марії Мальцовской став Міро Жолобаніч із гуморесками.

Міро Жолобаніч ся народив 13-го юна 1956-го року, молоды рокы пережыв у Пчолинім, Сниньского окресу. Ґімназію закінчів у Снинї, пак продовжовав штудії на Філозофічній факултї Універзіты Павла Йозефа Шафарика в Пряшові. Робив высокошкольского педаґоґа, але і педаґоґа про арештантів. Моментално є у выслуговій пензії. Жыє в Кошіцях. Дотеперь му по русиньскы вышли три книжкы афорізмів доповненых карікатурами: Хто ся сміє, є одважный у 2017-ім роцї, Хто ся сміє, є мудрый у 2018-ім роцї і книжка Хто ся сміє, є здравый, яка вышла в роцї 2019.

Літературны творы оцїнёвала тричленна порота. Вітязны творы будуть публікованы в часописї Русин, конкретно в літературній прилозї Поздравлїня Русинів на рік 2021 ч. 2.

Петро МЕДВІДЬ, ЛЕМ,фн, языкова і ґграфічна управа: ред. АРК в СР.