31. 5. 2018: В менї славянства. Одкрытя бусты Венеліна-Гуцы

26-го мая 2018-го року в селї Тибава, котре находить ся у Свалявскім раёнї Закарпатьской области Україны, проходила велика історічна подія із нагоды одкрытя памятника вызначному славяньскому ученому русиньского походжіня, булґарістови, історікови, етноґрафови, фолклорістови і лінґвістови – Юріёви Венелінови-Гуцови.

В роднім селї Венеліна-Гуцы в тот день зышло ся велике множество жытелїв Закарпатьской области, академічной еліты реґіону, представителї обществ, представителї одескых Булґарів, сусїдніх реґіонів і Санкт-Петербурґа. В рамках торжества одбыла ся меджінародна конференція на тему Славяньскый світ: Юрій И. Венелін-Гуца. На спомянутій конференції одзвучало девять рефератів. Меджі выступаюячіма з рефератами были наприклад заслуженый учітель Україны Михаіл Алмашій; отець Димитрій Сидор, кандідат богословскых наук, котрый є настоятелём православного Кресто-воздвиженьского катедралного собору в Ужгородї; Людмила Несух, ректор Восточно-европской славяньской універзіты в Ужгородї ці проф. Галина Радчук, докторка псіхолоґічных наук, котра є ведучов Катедры практічной псіхолоґії на Тернопільскій націоналній педаґоґічній універзітї імени В. Гнатюка.

В рамках другой части святочной події Преосвященый владыка Феодор, єпарха Мукачівско-Ужгородькой православной єпархії, приговорив ся ку участным і звернув увагу на велике значіня Юрія Венеліна-Гуцы, вызначного представителя підкарпатьской інтелектуалной еліты ХІХ. стороча, котрый зохабив по собі величезну наукову дїдовизну із славяньской історії. Із своїма приговорами выступали і далшы вызначны гостї, як Анток Кіссе, член булґарьской народностной меншыны, народный посланець Верьховной рады Україны ці булґарьска журналістка з Україны Аня Терезивець.

В рефератах, як і в приговорах при одкрываню памятника спомянула ся і роль науковцїв ХІХ. стороча, котры были русиньского походжіня, як Іван Орлай, Михаіл Балудяньскый, Віктор Кукольник, Петро Лодій, і котры дали вклад до културного просвічіня Росії і Україны.

На кінцю цїлой події одбыв ся концерт, в рамках котрого прозвучали стихотворіня і музичны творы на тему Юрій Венелін-Гуца в художній і музичній творчости.

 

Автор: Михаіл АЛМАШІЙ,

переклад і обробка: Петро Медвідь.

 Статя была корочена.