31. 8. 2016: Гуменне нагородить Народного маляря Ореста Дубая

І того року буде місто Гуменне передавати Цїну міста Гуменне. Із трёх выбраных про нагороду є і Народный умелець Орест Дубай. Вырїшыли о тім посланцї Містьского заступительства в тайнім голосованю. Нагороды ся будуть предавати на святочнім засїданю заступительства почас септембровых святковань Памятного дня із нагоды 699-го юбілею першого писемного документу о містї. In memoriam Цїну міста Гуменне того року здобуде і русиньскый академічный малярь Орест Дубай.

Народив ся Орест Дубай 18-го авґуста 1919-го року в селї Велика Поляна, во втогдышній Чехословакії. Быв малярём, ґрафіком, педаґоґом. По закінчіню руськой ґімназії в Пряшові і Мукачові продовжовав у штудіях на Высшій технічній школї в Братíславі. Там зістав і жыти. Ілустровав ґазеты, вступив до ґрупы Голлара і Алеша.

Дубай розвинув свій неповторный ґрафічный штіл, ёго возлюбленым жанром были релъєфы малого розміру на дереві, кераміцї і каміню. З ёго композіцій треба бізовно спомянути цікл „In memoriam Tokajík“ із 1949-го року, котрый быв присвяченый русиньскому селу, яке было зничене націстами у 1944-ім роцї.

В 1960-ых роках Дубай робив у штілї оп-арту. Зробив дакілько декоратівных скулптурных творів про інтерьєры публічных будов на Словакії, в котрых схосновав метал, скло і промысловы матеріалы.

Од 1949-го року Орест Дубай учів на Высшій школї вытварного уменя в Братїславі, здобыв тітулы доцента і професора, в рр. 1968 – 1971 быв і ректором той школы. Быв удостоєный названём Заслуженого умелця Чехословакії (1969 р.), Гародного умелця Чехословакії (1977 р.) і став ся честным членом академій у Флоренції (1964 р.) і в Римі (1972 р.)

Орест Дубай належыть міджі найвызначнїшых малярїв і ґрафіків 20-го столїтя на Словакії. Выставкы ёго образів одбыли ся наприклад в Берлінї, Будапештї, Баґдадї, Кагірї, Москві, Уланбатарї ці во Флоренції. Вігорлатьскый музей в Гуменім має во своїм збірковім фондї велике множество Дуваёвых творів, котры Дубай музею сам даровав. У 1994-ім роцї была в Гуменнім одкрыта Ґалерійна сала Ореста Дубая.

Умер Орест Дубай 2-го октобра 2010-го року в Братїславі.

-р-