31. 8. 2020: Цїна Йозефа Мілослава Гурбана про єпіскопа Ґойдіча

Председа Народной рады Словацькой републікы Борис Коллар в понеділёк, 31-го авґуста 2020-го року, інформовав о лавреатах Цїны Йозефа Мілослава Гурбана. In memoriam буде оцїненый і русиньскый ґрекокатолицькый єпіскоп, блаженый Павел Петро Ґойдіч.

Председа парламенту буде оцїнїня удїлёвати у віторок, 1-го септембра 2020 року, коли є на Словакії державне свято – День конштітуції Словацькой републікы. За Ґойдіча прийде цїну перевзяти владыка Йоан Бабяк, архієпіскоп пряшівскый і метрополіта Словакії.

Сатісфакція церьквам

Коллар на пресконференції повів, же цїну буде передавати людём, котры у своїм жывотї зробили много про Словакію і єй жытелїв. В припадї Ґойдіча за ёго словами іде і о сатісфакцію церьквам, котры в 1940-ых і 1950-ых роках зажыли перзекуцію.

„Є то і особный голд особі, котра в такых тяжкых часах проявила невіроятну особну храбрость і не зломили го ани нелюдьскы условія,“ повів председа словацького парламенту.

Ґрекокатолицька церьков собі тот рік припоминать 60 років од мученицькой смерти єпіскопа. В місяцї май того року му была одкрыта памятна табла на арештї в Леополдові, в котрій і умер. На одкрытю таблы так само брав участь і председа парламенту.

Меджі лавреатами є іщі вызначный словацькы доктор Владимір Кырчмері а особности Баршановой револуції 1989-го року Мілан Княжко і Ян Будай. In memoriam дістане оцїінїня вєдно з Ґойдічом і рабін Роні Кон.

Цїна Йозефа Мілослава Гурбана

Удїлїнём державной Цїны Йозефа Мілослава Гурбана оцїнює председа Народной рады Словацькой републікы особу або колектів за вынятково вызначны заслугы, резултаты роботы або діяня в области леґіслатівы, права, розвитку демокрації або конштітучности в Словацькій републіцї або в гуманітарьній области.

Цїна ся удїлює 1-го септембра, хоць председа парламенту може становити і іншый день, а оцїненый діставать честный тітул Носитель державной цїны Йозефа Мілослава Гурбана.

Председа парламенту вырїшує о удїлїню на основі пропозіції Конштітучноправного выбору Народной рады Словацькой републікы, но може єй удїлити і без пропозіції. Пропозіції можуть давати парламентному выбору фізічны і правницькы особы до 31-го мая каждый рік.

Петро МЕДВІДЬ, ЛЕМ.фм, языкова управа і зміна фотоґрафії: ред. АРК в СР