4. 10. 2018: Перенесут памятник Никыфора в Креници

В червци/юнію 2018 р. місто і ґміна Крениця підписало договор з компанійом, яка проведе ревіталізацийны роботы в центрі міста. Бесіда про Поляну Янівка, на обшыри котрой находит ся м.ін. славний памятник Никыфора. Ревіталізацийны пляны закладают перенесіня памятника в нове місце.

Як чытаме на офіцияльным сайті ґміны Крениця, в пятницю, 28. вересня / септембра 2018 р., запрезентуваны были пляны перебудовы реченой части міста. В опубликуваных плянах представленя была візия Поляны Янівка, яка навязувати має до періоду меджевойня. Цілю привернути давний вид, інвестор мусит зобрати всякы позволіня, м.ін. од консерватора памяток. До кінця 2018 р. мают быти довершены лем формальности. Модернізация зачне в будучым сезоні.

В плянах є 16 ріжных задач. На представленых візуалізациях видно, што на обшыри поляны буде посадженых вельо дерев, выконаны будут камінны стежкы та, цілю вказати більшу присутніст Епифана Дровняка – замонтуваны будут річы навязуючы до уличного малярства.

В парку зорґанізувана буде простір для діти. Довкола ней мают быти поставлены копіі образів Никыфора. Туристы і жытелі міста, якы зайдут до нового парку, мают хоц кус почути ся як сам артиста. Прото тіж інсталюваны мают быти специяльны лавкы, близко котрых будут поставлены малярскы дошкы, на якых буде мож творити своі образкы.

Найбільше заінтересуваня выкликує плян перенесіня памятника Никыфора – Епифана Дровняка. Дотепер стоіт він при вході на поляну. Подля ініцияторів ревіталізациі, памятник має быти тепер пересунений барже на середину поляны, де буде ліпше експонуваний. Довкола него зроблят нову аранжацию, т.є. камінну стежку, лавкы, а тіж освітліня і рослины.

Припомнийме, што памятник был одкрытий 9. вересня/септембра 2005 р. з ініциятивы м.ін. Стоваришыня Лемків. На подіі присутний был товдышній Президент ПР Александер Кваснєвскій. Тот рік присвячений єст 50. річници смерти Епифана Дровняка – Никыфора Криницкого.

Ревіталізацийны пляны доступны на сайтi www.krynica-zdroj.pl.

Севериян КОСОВСКЫЙ, лем. фм., фото: Вікіпедія

(Публікуєме в оріґіналї – лемківкім варіантї русиньского языка.)

Script logo