4. 11. 2017: Умер новинарь і културный діятель Михайло Зазуляк

Як інформовала пресова аґентура Рутенпрес, вночі з пятніцї 3-го новембра на суботу 4-го новембра 2017-го року по тяжкій хвотор умер в шпыталю у Вербасї во віцї 57 років русиньскый новинарь, културный діятель – Михайло Зазуляк.

 

Народив ся Михайло Зазуляк в Руськім Керестурі 12-го апріля 1961-го року. Там жыв і робив як новинарь од 1984-го року в новинках „Руске слово“, котри выходять в Новім Садї, єден час быв і головный редактор керестурской редакції тых новинок. Од 2010-го року быв редактором пресовой аґентуры Рутенпрес. Михайло Зазуляк быв і довгорічным співрацовником Радіа і телевізії Новый Сад, наперед робив проґрамы в русиньскім языку, но пізнїше і по сербскы.

 

Окрем новинарьской роботы, Михайло Зазуляк быв і довгорічным актівістом в рамках русиньской културы. Быв членом бывшого русиньского театру „Дядя“ і сучасного Русиньского народного театру „Петро Ризнич Дядя“. В театрї діяв як герець, член веджіня, режісер і автор тлумчінь драматічных текстів. Як актора го люде знали нелем з театру, а і з радіовых пєс, котры приготовлёвала русиниска редакція в Новім Садї, ці русиньскых проґрамів новосадьской телевізії. Як бывшый успішный декламатор од 1982-го року реґуларно приготовлёвав русиньскых декламаторів, но і декламаторів на україньскім і сербскім языках. За свою роботу в театрї і в области декламації быв нагородженый в рамках Войводины і на цїлорепубліковім уровню. Од 80-ых років Михайло Зазуляк брав актівну участь і на творіню проґрамів про найвекшы русиньскы културны події у Войводині – фестівал „Червена ружа“, Драматічный меморіял „Петро Ризнич Дядя“, „Костельникова єшень“, но і про многы далшы події.

 

Михайло Зазуляк діяв і в рамках Націоналного совіту Русинів, наперед як секретарь Одбору про културу, пізнїше як член совіту і ёго културного одбору.

Похованый буде Михайло Зазуляк в недїлю, 5-го новембра в ёго роднім Руськім Керестурї. Вічная ёму память!

 

П. М.