4. 11. 2025: Кралёва была одкликана із функції директоркы. Без пояснїня причіны
Ку 22-му октобру 2025-го року была із функціі директоркы Словацького народного музея – Музея русиньской културы (СНМ МРК) в Пряшові одкликана Люба Кралёва. Як уж стало звыком в резортї културы, якый під контролёв націоналістічной SNS, а під котрым є і СНМ, одкликана была без того, жебы їй была пояснена причіна.
Із позіції єй одкликала ґенерална директорка СНМ Андеа Предайнёва. Тота была до своёй функції выбрата лем в маю того року. Русиньскый музей в Пряшові нова ґенерална директорка ани раз не пришла посмотрити.
Кралёвій было лем день перед тым оголошене, же має прийти до Братїславы. Там дістала уж лем документы на підписаня.
„Лем устно мі повіла, же єм уж про музей стара, бо єм у пензійнім віцї. Самособов, не осмілила ся то написати, бо бы то была діскрімінація подля віку, і то бы было в незгодї такой із першов статёв Робочого кодексу,“ написала одкликана директорка на соціалній сітї односно того, як Предайнёва арґументовала свій крок.
„Было повіджене, же беру місце молодым, бо діставам плат і пензію. Лемже я плат не діставам за нич, вірю, же за мнов у музею за тот плат відїти фалат роботы выконованой на благо Русинів,“ написала Кралёва.
Припоминаме, же ку кінцю марца быв одкликаный і директор СНМ – Музея україньской културы у Свіднику Ярослав Джоґаник. Од 1-го октобра є директором того музея Ян Пивоварник.
Тот із музейництвом ниґда не робив, учів предметы повязаны із тїлеснов выховов на Пряшівскій універзітї. Меджі ёго „кваліфікації“, котры собі написав у біоґрафії, належыть наприклад 5-ый дан карате Ґою-рію. Пивоварник є членом владной партії SNS. Выменованый быв до функції по конкурзї, до котрого ся приголосив і Джоґаник. Пивоварник быв на конкурзї подля комісїї найлїпшый.
Люба Кралёва была до функції директоркы СНМ – Музея русиньской културы выменована ку 1-му авґусту 2019-го року. Музей під їй веджіньом дістав другый дых. Почало ся робити веце подій, а то нелем выставы, але і різны медайлоны особностей, бісїды, творчі варштаты ітд. До музея почали реґуларно ходити школярї і штуденты із різных школ. Музей першый раз дав роботу професіоналови – етнолоґови, котрого довтогды од початку свого єстівованя не мав.
СНМ – Музей русиньской културы так само обновив і посилнив сполупрацу із русиньскыма орґанізаціями.
Кралёвій ся подарило зреконштруовати цїлый єден тракт будовы, де выникли репрезентатівны просторы, якы сповнюють условія, жебы могли служыти як музейны. У 2021-ім роцї в музею одкрыли Выставну салу Михала Дубая.
Днесь уж бывша директорка Люба Кралёва дакілько раз намагала ся і подавала жадости на реконштрукцію цїлой будовы русиньского музея. Все то было блоковане, будь із боку самого СНМ, або із боку Міністерства културы СР. Послїднї рокы русиньскому музею нe хотїло веджіня СНМ схвалёвати ани грошы на аквізіції ці іншы выдавательскы або бадательскы проєкты.
Петро МЕДВІДЬ, ЛЕМ.фм, языкова і ґрафічна управа: АРК СР
