4. 12. 2020: Гелена ҐІЦОВА-МІЦОВЧІНОВА: Молитва матери (1) (Стихы)

Гелена ҐІЦОВА-МІЦОВЧІНОВА

МОЛИТВА МАТЕРИ (1)

Од маленька в сердцї
якусь тайность ношу,
што од Всевышнёго
у молитві прошу.

Най учує нянько
і ласкава мати,
помож,  Боже,
род русиньскый
словом прославляти.

Помож дїтём по своёму
все ся помолити
а у церькви родным словом
Бога все хвалити.

***

Нераз перед спанём
просять ся дїточкы,
ці ся нам все
рано, вечур 
помолити 
треба,
ці не треба.

Але на їх вопрос
одповіла бабка.

Молитва
то не доджу
квапка,
што із неба
з синёй 
хмаркы
на землю
квапкать.

Із молитвов
є од Бога Отця
про каждого
выпрошена
по смерти
дражочка
до неба.

Зато ся нам
рано, вечур
Отче наш
і Богородице
помолити 
треба.

***

Хочу із молитвов
новый день почати,
а з Божов милостёв
по світї крачати.

Закличу на поміч
все і ангелика,
усердна молитва
поміч превелика.

Што із Духом Святым
прилетить під стрїху,
бо у слові Божім
глядам все потіху.

***

Ку Тобі, любый Боже,
щиро я ся молю
а із словом Божым
своє сердце гою.

Най  тота молитва
буде Тобі мила,
жебы-м кажде рано
Тебе поздравила.

А дозволь на світї
щі довго пожыти,
хочу тобі, Отче,
до смерти служыти.

(З приправлёваной книжкы Гелены Ґіцовой-Міцовчіновой – Поклад русиньской матери.)
 

Script logo