4. 2. 2025: Вышла друком Інтерфийса

Многы нашы чітателї уж може стрїтили ся із підкарпатьскым русиньскым порталом Інтерфийса. То некомерційный портал, цїлём котрого є шырити новости і погляды, старати ся школовати людей у технолоґіях, хоснуючі русиньскый язык.

Перед роком, кедь портал святковав у януарї три рокы, ёго основатеїі – Мигаль Лыжечко, котрого голос уж можуть знати і слухачі радія lem.fm, і Петро Біров, оголосили, же з нагоды основаня сайту рихтують про своїх чітателїв парадне святочне друковане выданя, в котрім будуть найлїпшы статї, якы были на порталї публікованы. Навеце, же в друкованім выданю чітателї найдуть і ексклузівны матеріалы, котры іщі на вебсайтї не были.

Хоць рихтованя друкованой публікації „Інтерфийса / Убрані статї 2024‟ тырвало дакус довше, через різны прічіны, днесь є вже публікація реалностёв.

Як авторы-редакторы публікації інформовали на своїм порталї, 1-го фебруара 2025-го року одбыла ся презентація друкованой, парпірёвой Інтерфийсы в Ужгородьскій публічній бібліотецї.

На презентації гостї мали можность учути накурто од Мигаля і Петра, як ся зачінав проєкт Інтерфийса, як часом перешов із формату вістей у формат довшых статей, якы нюансы повпливали на процес роботы над книгов ітд. На презентації было мож нову книжку і здобыти.

Авторы інформовали, же публікація вышла в тіражи 300 фалатків, із котрых часть піде до бібліотек, часть у выбраных місцях в Ужгородї до продая.

Кедь выникла думка выдати зборник статей із порталу Інтерфийса, мож было електронічно реґістровати ся вшыткым, котры мали інтерес о тоту публікацію. Мигаль Лыжечко і Петро Біров на зареґістрованых не забыли. В найблизшых днях їх будуть контактовати, жебы уточнити детайлы заплачіня і доручіня.

Петро МЕДВІДЬ, ЛЕМ.фм, языкова і ґрафічна управа: АРКСР.