4. 7. 2016: Фестівалы в юли в пряшівскій области
Зачали літнї вакації і то час, коли орґанізують ся і різны фестівалы – в тім чіслї і русиньскы. Выбрали сьме про Вас три інтересны події, котры варто навщівити в місяци юл 2016-го року.
Свято Русинів з обох боків Дунайця
Славности културы Лемків/Русинів, або свята Русинів з Польщі і Словакії ся одбудуть в купелях Смерджонка в Червенім Клашторї 9-го юла того року од 11.00 год до пізного вечера. Ґрекокатолицька літурґія, русиньска кухня і богатый фолклорный проґрам із нашым професіоналным ПУЛЬС-ом, камюньскым Барвінком, лемківсков Терочков і іншыма колектівами, як Удолчанка з Удола, Чірчанка з Чірча, Вінок із Шарішского Ястрабя, Біловежанкы з Біловежы і выступами русиньскых співачок Анны Порачовой і Маріянны Железной і дуа Карашовых – тото вшытко на Вас чекать уж тоту суботу.
Традічны свята в сканзенї
В недїлю 17-го юла 2016 по Русиньскій ватрї на Малім Липнику, буде проходити вже традічный фестівал під назвов Славности Русинів під градом. Подія, котру шторік орґанізує Русиньска оброда на Словеньску буде і тот рік проходити в любовняньскім сканзенї. Проґрам зачінать о 12.30 год. церьковнославяньсков літурґіов з русиньскыма чітанями і проповідёв у деревяній цеьркви в сканзенї. По літурґії буде проґрам о 13.30 год. продовжовати выставков фотоґрафій і о 14.00 зачне културный проґрам на амфітеатрї.
Шарішскый і русиньскый фолклор
Русиньска оброда на Словеньску позывать і на Переглядку русиньского і шарішского фолклору. Подія одбуде ся 24-го юла 2016 од 14.00 год. у сканзенї в Бардеёвскых Купелях. У проґрамі выступлять Шарішанцї з Пряшова із солістом Любоміром Шімчіком, Фолклорный колектів Біловежанка з Біловежы, Мужска співацька ґрупа з Ряшова, Женьска співацька ґрупа зо Златого, Марія і Патрік Шуркаловы з Бехерова, Співацька ґрупа Самы собі з Бардеёва, Крістіна і Домініка Фечанїновы зо Снакова, Степанія Ковачова з Ортутовой, Вероніка Данькова з Кружлёва, Андреа Фотькова з Кожан, Терезія і Тобіас Черкаловы з Бардеёва, Славомір Козак з Бардеёва, Елішка Чехова з Бардеёва, Тамара Кухтова з Осікова і Леа Козакова з Бардеёва. Мoдeраторков проґраму буде Марія Шуркалова.
П. М.
