4. 8. 2024: Спор мімо „мейнстріму“
В остатнїх днях світовы медії в рамках середнёевропского простору інтересує головно діпломатічный спор меджі „братняками“ – Мадярьском і Польщов. Дакус в тїни находить ся іншый спор, но о то важнїшый.
В послїднїх днях в медіях говорить ся головно о діпломатічнім спорі меджі Мадярьском і Польщов, котрый є лем завершінём довгодобо іншых поглядів на політіку што до войны на Українї і односин із Москвов. Меджі Варшавов і Будапештом якбач не было ниґда веце менталных кілометрів як їх є теперь, і в главнім містї Польщі вже зазвучав вопрос, чом властно Мадярьско іщі хоче зістати членом Европской унії і НАТО.
То, што затля зістало мімо простор світовых мейнстрімовых медій, або кедь ся о тім інформовало, так лем барз курто, суть высловы польского підпредседы влады, міністра обраны і шефа владных людовцїв Владислава Косіняка-Камиша. Притім якраз ёго слова знова дакус приближують польску політіку з тов мадярьсков.
Віцепремєр ся перед пару днями в єдній із польскых телевізій высловив, же не буде жадного вступу Україны до Еропской унії, не будуть жадны одкрыты граніцї, жаден вольный рынок, покля не вырїшыть ся справа Волинї.
Знаме, же Волиньска рїзанина є єдным із найболістнїшых моментів історії польского народа. А так само знаме, же Україна дотеперь властно не одсудила ясно тоты історічны дїї, навспак, злочінцїв, котры кров волиньскых жертв мають на своїх руках, прославлять як героїв.
Навеце, і кедь сучасный презідент Україны Володимір Зеленьскый намагав ся при 80-ій рочніцї той масакры даякым способом бісїдовати так, жебы польскій сторонї хоцьлем дакус „погласкав“ уха, реалность є така, же далше бранить ся ексгумації, перепохованю жертв, будованю цінтерів. Но і далше суть героями на Україні – Бандера, Шухевіч і так далше.
Покля дотеперь Польща явила ся як партнер, котрый безусловно од початку повноформатовой войны у 2022-ім роцї підтримує Кієв, слова віцепремєра дакус змінили тот образ. Тоты слова, окрем іншого, значать і то, же і Польща має свої граніцї а інтересы, через котры „не іде влак“.
Самособов, можеме собі повісти, же то лем слова лідра меншой владной партії людовцїв, но і премєр Туск в припадї, же бы ся людовцї поставили на заднї ногы, не може іти до різіка, жебы стратити їх голосы, кедь хоче утримати векшыну.
Навеце, мінить то образ польской політікы і в тім, же она не є монолітом што до безусловной підпоры Україны, і же не є монолітом ани в тім, жебы тему Волинї зохабили польскы політіци „выбавлёвати“ лем крайній правіцї.
В непослїднїм рядї то вказує і на факт, же і кедь односины меджі Польщов і Мадярьском суть моментално барз злы, предсі то не буде наконець лем Мадярьско, хто реално буде хотїти дашто за дашто. Значіть, просаджіня своїх інтересів зато, жебы голосовати за вступ Україны до Европской унії.
Тот спор о Волинь є мімо „мейнстріму“ лем затля. Но покля реално буде мала іти інтеґрація Україны далше по пути, пак є можливым, же іщі буде мати барз много простору і в тых медіях, котры о тім днесь, так само „безусловно“ як многы западны політіци в односинах із Українов, мовчать.
Ясне дїло, же Польща в припадї Волинї стоїть на правилнім боцї. І Україна бы мала ясно поставити ся ку тому вопросу.
На другім боцї треба припомянути і то, же Польща так само має іщі єден історічный довг, довг односно історічной памяти, і тот дотулять ся ясного одсуджіня такзваной Акції Вісла, в котрій потерпіли Русины.
Петро МЕДВІДЬ. Статя была написана як коментарь „Вступне до контроли“ лемківского радія lem.fm. Языкова і ґрафічна управа: АРК в СР.
