4. 9. 2025: Любовняньскый музей має за собов успішне лїто. Місто дістало ся до Forbes

Лїтнї вакації оцїнюють на Любовняньскім градї барз позітівно. Як потвердив про аґентуру TASR директор Любовняньского музея Далібор Микулик, за місяцї юл і авґуст евідують приблизно чотырипроцентове нароснутя чісла навщівників.

За першых вісем місяцїв 2025-го року пришло на град і до сканзену, де суть і обєкты з русиньслых сел, приблизно 187 тісяч турістів, што є докінця о вісем процент веце як в попереднїм роцї.

„Беру то за великый успіх, кедже реґіструю великы знижіня навщівности в нашім реґіонї і реґіонах околіцї. Окрем того, же град безперерывно обновлюєме, і презентуєме дома і в загранічу, сприступнюєме все штось нове, зато то приписую головно музейникам і людям, котры приготовили богатый проґрам, незвычайны експозіції і новы выставы,“ повів про аґентуру Микулик.

За словами директора нич ся не мінить на тім, же найвеце турістів приходить із Словакії, за нима суть турісты з Польщі, пак із Чеськой републікы а Мадярьска.

Микулик думать, же покля бы была на Словакії лїпша інфраштруктура, заевідовали бы нароснутя навщівників так само з іншых держав. „Я сам навщівив дакілько велеторгів турістічного руху, є інтерес із країн як Іспанія і Франція, але бракує транспорт до нас, ці по землї або у воздусї,“ підкреслив.

Град буде одкрытый і почас осени, а Любовняньскый музей на нїм рихтує веце далшых інтересных подій.

„Помалы рихтуєме і богатый рождественный проґрам, а думаме на рік 2026, коли музей буде святковати 70 років свого існованя,“ повів директор з тым, же рихтують в слїдуючім роцї і нову воєньску експозіцію, а так само якраз теперь рїшають колавдацію северовыходной стїны граду.

Стара Любовня може похвалити ся нелем успішным лїтом на градї, але і тым, же місто ся нашло в америцькім выданю часопису Forbes. Редакція того часопису выбрала єденадцять найкрасшых малых місточок в Европі.

„Місточко Стара Любовня, котрого історія сягать аж до року 1292, вабить турістів міксом історії, културы і природы,“ написав Forbes  з тым, же далше описав події, котры шторік одбывають ся на „імпозантнім Граді Любовня“.

Петро МЕДВІДЬ, ЛЕМ.фм, языкова і ґрафічна управа: АРК СР.

Фото: FB/Ľubovnianske múzeum.