5. 10. 2018: В Чабалівцях посвятили обновленый войновый цінтерь

Як інформовала словацька державна пресова аґентура TASR у четверь, 4-го октобра 2018-го року, посвятили зреконштруованый войновый цінтерь із Першой світовой войны в Чабалівцях.

На пєтній події із нагоды сторічніцї войны брали участь представителї Міністерства внутрїшнїх дїл Словацькой републікы і Міністерства обраны СР, нїмецькый воєньскый аташе і представитель Амбасады Російской федерації на Словакії.

 

Унікатный проєкт трёх держав

Подля Михала Бодіна із Общества старостливости о нїмецькы войновы гробы на Словакії є на цінтерї Першой світовой войны в Чабалівцях, окрес Меджілабірцї, похованых 2600 аж 3000 павшых вояків. Точна кількость не є знама, бо на цінтерї суть і шахты, в котрых є похованых дакілько вояків довєдна.

Цінтерь перешов у роках 2016 аж 2018 реконштрукціёв, котру реалізовав нїмецькый „Bundeswehr‟ вєдно із Озброєныма силами Словацькой републікы. Оправу фінанчно підпорило і Міністерство внутрїшнїх дїл Словацькой републікы. В далшій етапі до проєкту залучіла ся Російска федерація, котра дала грошы на оплочіня. Якраз то, же є то проєкт Словакії, Нїмецька і Російской федерації, є подля слов Бодіна унікатом. Містне населїня так само дало свій вклад до проєкту, кедь за властны грошы збудовало каплічку.

Зновупосвячіня цінтеря, котре проходило у четверь, є єднов із централных подій ку сторічніцї закінчіня Першой світовой войны. Подія проходила з участёв Воєньской музикы, членів Озброєных сил Словацькой републікы, церьковных представителїв і шырокой публікы. В Чабалівцях зазвучала словацька, нїмецька і російска гімна. Мож было відїти заставы вецеро наслїдницькых держав бывшой Австро-Угорьской монархії і далшых держав, котры на події заступали їх діпломаты.

 

Цінтерь є в бывшых Стерківцях

Чабалівцї находять ся сім кілометрів од міста Меджілабірцї. Першый писемный документ о селї є із 1494-го року. В другій половині 19-го столітя до села адміністратівно приєднали довтогды окреме село Стерківцї.

Войновый цінтерь в Чабалівцях находить якраз в містній части Стерківцї. Належыть меджі найвекшы із Першой світовой войны на северовыходї Словакії. Войновый цінтерь є на краю сільского цінтеря, в напрямі на Выраву. Од драгы оддїлює го лем оплочіня сільского цінтеря і ярок. Вступ на войновый цінтерь веде через сільскый цінтерь.

Петро МЕДВІДЬ, лем.фм, жрідло фотоґрафії: „Klub vojenskej histórie Beskydy‟