5. 12. 2019: Помочі деревяным храмам хотять навчанём старых ремесел

Ремеслами повязаныма з деревянов сакралнов архітектуров хоче безпрофітова орґанізація Карпатьскы деревяны церьвки (Karpatské derevené cerkvi, n. o.) із центром в Снинї свойпомічно утримовати деревяны храмы в Сниньскім і Собранецькім окресї.

Ожывліня традічного шындлярьства, іконопису і свічкарьства може так само подля слов Мірослава Бураля із споминаной орґанізації помочі турістічному руху в єнім з менше розвитых реґіонів на Словакії. Першый курз іконопису в Стащінї проходив почас попереднёго вікенду. Інформовала о тім аґентура TASR.

 

Мобілный варсштат

„Актуално робиме продовжіня проєкту, почас котрого сьме інвентарізовали ремесла в сниньскім реґіонї подля села і ремесел. Нашым першорядым цїлём суть ремесла, котры суть повязаны із сакралнов архітектуров. Хочеме ся выбавити, презентовати, але і мати то приготовлене так, жебы годны сьме быти мобілны і утримовати деревяны храмы. Подля ‚гесла превенція утримованём‘ не зохабити памяткы упадати,“ повів про аґнетуру о головных цілях орґанізації Бураль.

Представа є така, жебы зрядити мобілный варсштат, котрый бы в реґуларных інтервалах навщівльовав села, в котрых суть деревяны церьковці, і могли ся зробити малы потрібны оправы прямо на місці.

 

Навчіти традічны ремесла

Як Бураль про аґентуру доповнив, секундарным цїлём проєкту є навчіти містных жытелїв традічны ремесла, котры бы годны были хосновати як турістічну атракцію. Якраз писаня ікон є подля нёго атрактівне. Жебы были іконы штонайвеце автентічны, і на першім із серії трёх курзів, котры Карпатьскы деревяны церькви планують до кінця марца 2020-го року зреалізовати, хосновали участны темперу з яєць. „Хочеме, жебы то была яєчна темпера, значіть тота первістна, котра ту была, і писати або продуковати іконы нашой провенієнції,“ пояснив Бураль.

Почас вікенду в Стащінї участны першого курзу, під веджінём лекторькы Ядвіґы Денісюковой із Польщі, котра пише іконы подля церьковного канону, писали ікону Манділіон, котра походить із села Луків-Венеція. Ікона є моментално в Словацькій народній ґалерії в Братїславі.

 

По реконштрукціях освіта

Безпрофітова орґанізація Карпатьскы деревяны церькви зачала освітнёв і навчалнов діялностёв занимати ся по серії успішных реконштрукцій деревяных храмів у сниньскім і собранецькім реґіонї, котру реалізовала в роках 2014 аж 2016.

Як інформовав Мірослав Бураль, того часу тоты актівности будуть годны реалізовати в части будовы в Стащінї, котра має быти в будучности музеём. Актівности орґанізація реалізує в рамках проєкту Ожывлїня традічных ремесел на Земплінї, котрый быв підпореный з проґраму реґіоналного розвитку Уряду підпреседы влады Словацькой републікы про інвестіції і інформатізацію.

Петро МЕДВІДЬ, ЛЕМ,фм, жрідло фотоґрафії: Karpatské drevené cerkvi, n.o.