5. 12. 2025: Одбыло ся засїданя Світовой рады русиньской молодежи

29-го новембра 2025-го року в сербскім Коцурї одбыло ся 4-те засїданя Світовой рады русиньской молодежи Світового форуму русиньской молодежи (СРРМ СФРМ). Інформовав о тім секретарь Іван Лїкар.

На засїданю взяли участь предсидателька СФРМ Светлана Бойчук із Румунії, підпредседа Александер Грічко із Словакії, Матей Бурчак із Хорватії, Яну Томкову із Чеськой републікы заступала Вероніка Словікова, і секретарь Іван Лїкар. Гостів привітав домашній член Рады Срдян Ґовля із Сербії.

Проґрам засїданя мав сім пунктів, в рамках нёго обговорила ся і Стрїча русиньской молодежи, котра бы мала одбыти ся в Новім Орахові у 2026-ім роцї. Членове бісїдовали і о планах роботы до будучности.

Світовый форум русиньской молодежи планує офіціалну реґістрацію, подобно як то має Світовый конґрес Русинів, на Міністерстві внутрїшнїх дїл Словацькой републікы. На основі реґістрації СФРМ буде годен одкрыти собі банковый рахунок, а пак і жадати дотації на своє дїятельство.

Проєкт стрїчі молодых, котра бы мала одбыти ся в Новім Орахові в слїдуючім роцї, одпрезентовав на засіїаню Дарко Заґорац – член Форуму молодых орґанізації Руска матка. Подля планів бы стрїча мала тырвати три днї. Із каждой членьской орґанізації СФРМ бы мали брати участь трёми аж штирми участници у віцї од 18 до 30 років.

В Коцурї обговорили на засїданю і зміны в штатуті, котрый бы мав быти згодный із словацькыма законами. Засїданя комісії про зміну штатуту бы мало проходити в януарї або фебруарї слїдуючого року.

Засїданя СРРМ одбыло ся в рамках 15-го Меджінародного фестівалу гумору і сатіры Коцурска чутка. Як інформовав секретарь Іван Лїкар, далше засїданя є наплановане онлайн формов на 18-го децембра.

Петро МЕДВІДЬ, ЛЕМ.фм, языкова і ґрафічна управа: АРК СР.