5. 3. 2021: Юрко ХАРИТУН: Студничкы, Концерт боцанів, ххх (Стишкы)

Юрко Харитун

СТУДНИЧКЫ

Із кількох студників
ты воду пила
із кількох пив і я?
Може на руках
тілько пальцїв не маю
Заганьбену руку
намочіти хочу
на плече положыти тобі
жменями гнївы розмечу
п-р-о-п-а-д-у-ть
як молга вата над рїков
У студнику місячік
із звіздочков своёв
купати ся будуть

КОНЦЕРТ БОЦАНІВ

Жытя моє кодиля
хтось клоча із нёй скубе
в природї так велё мелодій
орхестер рве ся до небес
і спів поломінём росте
Вітор гладить вільхам бороды
листём прикрывать слїды
де часто споминкы заблудять
як голубы орлы
в часї розлукы
Великый аплавз боцанів
за тепле лїто
зжыты із старов стрїхов
но мусять до світа
до теплых країв
Мають высоканьскы цїлї
бо небо так близко
З великов приязнёв
позерам на їх дзёбкы
Помалы рушать на дорогу
Такый концерт собі не одопру
хоць своє сердце
колом підопру

х х х

Сплїтам думкы-ниткы
як павучік сіть
не мухы до нёй їмам
лем свою тїнь
Як кінь утїкать
цїлый день
Коли постою
лежыть як пень
Росплету думкы-ниткы
привяжу на хмары
Сполошана тїнь
пропаде в хотари

(З приправлёваной книжкы Юрка Харитуна – Надгорїты мої днї.)