5. 3. 2025: Варголовы творы выставляють ся в Пардубіцях в Чеській републіцї

Вдяка сполупраці Пряшівского самосправного края і Пардубіцького края ся до сусїднёго Чеська по десятёх роках дістали творы світознамого умелця (позн. ред.: русиньского походжіня) Енді Варгола. Конкретно ся стали інтеґралнов частёв загранічной выставы іншталованой у Ґочаровій ґалерії в Пардубіцях.

Выстава понукать 150 авторовых творів і ёго особны предметы із збіркового фонду жупного Музея модерного уменя Енді Варгола в Меджілабірцях, меджі іншым і тоты, котры в Чеській републіцї дотеперь не были выставлены.

Енді Варгол путує по Европі. Актуално можуть ёго роботы аж до юна 2025 відїти навщівници французьского музея La Banque v Hyéres а найновше ай в Ґочаровій ґалерії в Пардубіцях. Якраз ту 24. фебруара 2025 одштартовала выстава під назвом Жытый сон Енді Варгола. (Позн. ред.: Автором концепції і главным єй куратором є Др. Михал Бицко, ПгД.). Выстава буде отворена в Пардубіцях два місяцї, точнїше до 27. апріля 2025.  

Выстава в Пардубіцях є перерізом творчостёв іконы поп-арту од єй раннїх фаребных рисунків пером аж по славны сітёдруковы образы. Точнїше презентує Варголову творчость од 50-ых років до ёго смерти в роцї 1987. Єй інтеґралнов частёв суть такы Варголовы роботы, як інтерпретація да Вінчіго Послїднёй вечерї, іконічна Мерлін Монро в шестёх варіантах, але і ёго індіяньска маска і портфоліё Ганс Хрістіан Андерсен, котры в Чеській републіцї дотеперь не мож было відїти.

Вытварны роботы до Пардубіць были привезены з Варголового музея в Меджілабірцях, котре є актуално про розсяглу реконштрукцію заперте. Выставлены образы Енді Варгола были перевезены і умістнены в Ґочаровій ґалерії за строгых правил одностно точной кліматізації в теплотї од 20 до 25 ґрадусіц целзія, 50-процентовой вогкости, освітленых холодным світлом і з затемненыма окнами.

Ґончарова ґалерія почас выставы приправує допроводный проґрам. Навщівници музея можуть наприклад тїшыти ся на коментовану презентацію выставленого кураторами выставы, лекції о Е. Варголови, ёго жывотї і творчости, але ай на воркшопы ці іншы акції про тых найменшых дїтей аж по высокошколярів.

Вернісаж выставы у спомянутій ґалерії відїло 600 людей. Участь на нїй взяли: амбасадорка Словацькой републікы в Чеській републіцї Інґрід Броцкова вєдно з гейтманом Пардубіцького края Мартіном Нетоліцькым, підпредседом Пряшівского самосправмого края Штефаном Бєляком, директором Музея модерного уменя Енді Варгола в Меджілабірцях Мартіном Цубяком (позн. ред.: на фотцї в центрї з мікрофоном), як і далшыма четованым гостями зо Словакії і з Чеська.

Автор: (ts-PSK), переклад із словацького языка, языкова і ґрафічна управа: АРК СР.