5. 6. 2021: В Полонинах інвестують до ціклістічной інфраштруктуры. Робити ся буде і на україньскім боцї

В Полонинах прибудуть інтеліґентны ціклопритулкы, оддыховы зоны ці ціклотрасы. В рамках проєкту з Українов ся проінвестує понад міліон евр, з цїлём підпорити черезгранічну сполупрацу при будованю двох ціклоокругів.

Як інформовала в пятніцю, 4-го юна 2021-го року, Леа Геілова з Оддїлїня комунікації і пропаґації Пряшівского самосправного краю (ПСК), председа краю Мілан Маєрьскый підписав ґрантовый контракт ку проєкту під назвов Злїпшіня доступности і мобіліты в рамках SK-UA черезгранічного реґіону.

Цїлём проєкту, котрый є называный і Карпатьска мобіліта, є підпорити черезгранічну сполупрацу при будованю двох ціклоокругів – на словацькім боцї є то Полонины трейл, на україньскім Ужаньскый трейл.

Ціклопритулкы в Стащінї і Улічі

„В рамках розрахунку, котрый перевышує єден міліон евр, ся змодернізує понад шість кілометрів ціклотрас і выбудують ся елементы ціклоінфраштруктуры. Піде наприклад о інтеліґентны ціклопритулкы в селах Уліч і Стащін, але і оддыховы зоны в Улічі. Тїшыть ня, же поступныма кроками ся ближыме ку зреалніню пропонованой ціклотурістічной трасы Полонины трейл, котра має служыти про домашнїх, але і турістів,“ повів председа ПСК Мілан Маєрьскый.

На україньскім боцї граніцї піде главно о вычіщіня ціклістічных трас, значіня ціклотрас, будованя парковиск про біціґлї, іншталацію інформачных кіосків і маповых схем на ціклістічных трасах ужаньской біціґльовой стежкы.

Перепоїня на гранічный переход

Проєктове конзорціюм, на челї котрого є ПСК, творить і далшых пять партнерів. На словацькім боцї суть то села Уліч і Стащін, як і Лїсосільскогосподарьскый маєток Уліч. На україньскім боцї то самосправа Великый Березный і

Меджіреґіоналный центер загранічной сполупраці з Перечина.

Мілан Маєрьскый інформовав, же Пряшівскый самосправный край, окрем коордінації цїлого проєкту, зробить і технічну штудію перепоїня полониньской ціклостежкы на актуалный гранічный переход Убля – Малый Березный, і то докінця з алтернатівов потенціалного будучого переходу Уліч – Забрідь.

Проєкт Карпатьска мобіліта быв схваленый в рамках проґраму черезгранічной сполупраці ENI HUSKROUA іщі в новембрї минулого року, ёго імплементація зачала теперь в юни. Візіёв проєкту є злїпшыти біціґлёвы обставины модернізаціёв односной інфраштруктуры поздовж полониньскых і ужаньскых трас.

Петро МЕДВІДЬ, ЛЕМ.фм, ґрафічна і языкова управа: ред. АРК в СР. Жрідло фотоґрафії: Manfred Antranias Zimmer/Pixabay.

 

Script logo