5. 8. 2024: Вышла хосенна книжка Научайте, мамочкы, по своёму дїточкы

Елена Хомова-Грінёва теперь предложыла чітателёви свою нову збірку поезії в русиньскім языку азбуков і русиньскім языку латиніков. Уж сама назва Научайте, мамочкы, по своёму дїточкы (публікація у назві має хыбу, бо ословлїня „мамочкы‟ мать быти оддїлене комами) ясно говорить, же є то хосенна і потребна публікація про русиньскы дїти, їх учітелїв і родічів. Лем, жебы з той мілой книжкы чітали дїти, што ся учать русиньскый язык, або русиньскы родічі своїм потомкам. Книжка є і адекватно міло ілустрована Александров Павловсков-Грінёвов. Авторка уваджать же то є книжочка про дїти у віцї од 2 аж 10 років, же є то зборничок штишків, забавок і співаночок. Поетка ся так найновшов публікаціёв у рамках сучасной русиньской література на Словакії дістає по боку, наприклад, Людмілы Шандаловой. Міла книжочка є выдана про вшыткых Русинів і суть там, наприклад, такы любы стишкы, як Когут, Курка, Зозуля, Вовк, Качка, і далшы. Композіція поезії є проста, у віршах перевагу мають про дїти зрозумілы слова і описны метаморфозы. Книжку пропонуєме вшыткым, котры хотять дїти научіти по своёму, по русинькы. Также, вітай, новый прибыток до цїлковой русиньской літературы нелем на Словакії, але і за єй граніцями.

-р-