5. 9. 2018: Грошы на турістічный рух і до русиньскых реґіонів

Пряшівскый самосправный край підписав у рамках проґраму черезгранічной сполупрацї  „Interreg V-A‟ далшых 17 мікропороєктів. Суть реалізованы в партнерстві із здружінём Карпатьскый еврореґіон.

В краю ся проінвестує выше 600 тісяч евр, главно на актівности в турістічнім русї. Грошы підуть і до русиньскых реґіонів.

 

Проєкты приношають бенефіты

17 проєктів, як інформовала аґентуру TASR Даша Єленьова, говоркыня Пряшівского самосправного краю, ся зачінать реалізовати на теріторії краю і Підкарпатьского воєводства на польскім боцї граніцї вдяка партнерству із здружінём Карпатьскый еврореґіон. Цілково сума, котра піде на актівности із средств Европского фонду реґіоналного розвитку, є понад 1,5 міліона евр. На теріторію Пряшівского краю іде 603 тісяч.

„Проґрамы черезгранічной сполупрацїі Польщі і Словакії в минулім і актуалнім проґрамовачім періодї принесли і все приношають нашому краю много бенефітів. Реалізують ся великы інвестічны акції в транспортїі, інфраштруктур, турістічнім русї, освітї, но і незраховательне множество їменшых ініціатів, котры нияк не хочеме підцінёвати. Якраз мікропроєкты, коло котрых маєме на старости приготовлїня, схвалюючі, оцінюючі і контрольны процесы, суть того прикладом,“ повів председа Прюшівского самосправного краю Мілан Маєрьскый.

 

Грошы і до русиньскых реґіонів

Успішныма жадателями є веце субєктів, главно міста і села, но і орґанізації з области турізму. Мікропроєкты суть заміряны в першім рядї на іноватівны формы пропаґації черезгранічной теріторії, а і далшы актівности в области турістічного руху і културы.

Схвалены были і проєкты, котры будуть реалізовати ся на теріторіях з русиньскым населїнём. В Меджілабірцях ся із приділеных грошей будуть реконштруовати тяжка зброя з другой світовой войны, включно танку Т-24. В околіцї Снины будуть присвячати ся дїтям і молодежи формов курзів в природї Підпореный была і турістіка, котра дотулять ся астрономії, конкретно в селах Колоніця, в окресї Снина, і в Розтоках, Свідницького окресу. Грошы дістане і проєкт значкы Карпатьске небо, котрый людям представить і історічно менше знаму теріторію Вовчі горы, яка находить ся в Народнім парку Полонины.

Петро МЕДВІДЬ, лем.фм