6. 2. 2025: ПСК приєднав ся до Позіційного документу европскых реґіонів

„Пряшівскый самосправный край (ПСК) потвердив свою анґажованость в области підпоры когезной політікы Европской унії приєднанём ся до Позіційного документу европскых реґіонів.“ Інформовало о тім Оддїлїня комунікації ПСК.

Тым кроком ПСК придав ся ку веце як 120 реґіонам і містам із цїлой Европы, котры вєдно просаджують утримательный розвиток і злїпшованя якости жывота очанів

Підписом документу крайска самосправа выразила підпору про три ключовы пожадавкы, котры тот документ акцентує. Конкретно іде о доступность когезной політікы про вшыткы реґіоны, адекватный бюджет про довгодобы інвестіції, а так само о посилненый діалоґ меджі европскыма реґіонами і Европсков комісіёв.

Документ в пункті о дуступности когезной політікы про вшыткы реґіоны жадать заховати політіку соналежности, котра буде рефлектовати розмаїтость окремых реґіонів, і їх шпеціфічны потребы в области еколоґічной, діґіталной і демоґрафічной трансформації.

В рамках пункту, котрый дотулять ся адекватного бюджету, суть пожадавкы прямены на такый бюджет, котрый уможнить ефектівно рїшыти актуалны вызвы в різных частях Европы. Цїлём части заміряной на посилненый діалоґ меджі европскыма реґіонами і Европсков комісіёв є злїпшыти выконность когезной політікы по 2027-ім роцї посередництвом партнерства і вецеуровнёвого ряджіня.

„Політіка соналежности є унікатным інштрументом на мобілізацію фінанчных средств про рїшіня актуалных выкликів, як суть кліматічны зміны, діґітална трансформація, демоґрафічны посуны ці посилнїня безпечности. Єдночасно помагать зменшыти роздїлы меджі окремыма реґіонами і підтримує рівновагу в рамках єднотного рынку Европской унії,“ пише ПСК у своїм пресовім выголошіню.

Документ так само подля ПСК грає ключову роль при підпорї довгодобого утримательного роснутя, і помагать ку злїпшованю жывотных условій на містній уровни. Приєднаня ПСК до того документу є подля крайской самосправы фундаменталным кроком, котрый є пряменый ку інтензівнішій сполупраці меджі европскыма реґіонами, і ку наповняню общіх цїлїв утримательного розвитку.

Петро МЕДВІДЬ, ЛЕМ.фм, языкова і ґрафічна управа: АРКСР.