6. 8. 2018: Літманова є уж 10 років путницькім місцём

На горї Звір в селї Літманова, окрес Стара Любовня, в днях 4-го і 5-го авґуста 2018-го року в рамках Юбілейного року Пряшівской єпархії одбыв ся архієпархіалный одпуст. Літманова тот рік припоминать собі 10-ту річніцю од выголошіня за офіціалне путницьке місце Пряшівской ґрекокатолицькой єпархії.

Одпустовый проґрам завершыв ся недїльнов торжественнов літурґіёв, котрой головным служытелём быв пряшівскый архієпіскоп і метрополіта Словакії Іоан (Бабяк). Святочнов проповідёв приговорив ся участным кардінал Йозеф Томко, емерітный префект Конґреґації про єнвагелізацію народів.

Окрем великого множества священиків і тісячів людей, на церьковнім торжестві брали участь і далшы єпіскопы. Із Войводины пришов владыка Дюра (Джуджар), апостольскый екзарха про ґрекокатоликів у Сербії і в Чорній Горї, із Підкарпатя пришов владыка-помічник Мукачівской ґрекокатолицькой єпархії Ніл Юрій (Лущак), далше брав участь емерітный владыка-помічник Пражского апостольского екзархату Іоан Євген (Кочіш) і Андрей Імріх – емерітный помічный єпіскоп Спішской римокатолицькой діецезы.

 

Наймолодше путницьке місце

Гора Звір в русиньскім селї Літманова є наймолодше путницьке місце ґрекокатоликів на Словакії, днесь вєдно із Лютинов єдно із двох найвекшых.

В новодобій історії Літманова дістала ся до увагы главно в повязаню із зъявлїнями Пречістой Дівы на горї, котра є приблизно пять кілометрів од зачатку села, недалеко граніцї з Польщов. Правдивость тых дій є іщі все лем предметом баданя із боку Католицькой церькви.

Богородіця ся мала обявити двом дівчатам, втогды 11-річній Іветї Корчаковій і 12-річній Катаринї Чешелковій в деревянім майданї на луцї під лїсом. Богородіця собі мала желати, жебы дїівчата і люди ходили на тото місце молити ся. Зъявлїня тырвали од 5-го августа 1990-го року до 6-го авґуста 1995-го року. Нелем в тім періодї, но і по нім на тото місце в недїлю по першій пятніцї в місяцю, коли ся Богородіця обявляла дівчатам, зачало ходити штораз веце людей.

На основі того, і кедь церьков дії іщі все бадать, втогды іщі пряшівскый єпарха Іоан (Бабяк) выголосив 6-го авґуста 2004-го року гору Звір за Місце молитвы. О штири рокы пізнїше 7-го септембра 2008-року уж як архієпіскоп і метрополіта Словакії владыка Іоан выголосив гору Звір за Ґрекокатолицьке маріяньске путницьке місце Пряшівской ґрекокатолицькой єпархії.

Тот рік минать точно десять років од выголошіня наймолодшого путницького місця і зато быв тогорічный одпуст закомпонованый і до офіціалного проґраму святкованя 200-річніцї од основаня Пряшівской ґрекокатолицькой єпархії, котра у 1818-ім роцїі оддіїила ся од Мукачова.

Петро МЕДВІДЬ, Жрідло фотоґрафії: grkatpo.sk