6. 8. 2024: В Ню Йорку помолять ся Дяковный молебен і припомянуть собі сторочніцю

Як сьме вже інформовали скорїше, тот рік собі ґрекокатолици русиньской традіції в Споєных штатах Америкы припоминають сто років, одколи здобыли свою першу церьковну штруктуру і выникнув екзархат – попередник днешнёй Піттсбурґской архієпархії і Митрополітной церькви.

8-го мая 1924-го року быв Святішым Престолом зрядженый Піттсбурґскый апостольскый екзархат про Русинів. Папа римскый Пій XI. за першого екзарху про Русинів у Споєных штатах Америкы призначів Василя Такача. Єпіскопску хіротонію, родак із села Вучково на Підкарпатю, прияв у Римі 8-го юна того самого року.

Владыка Такач пришов до Ню Йорку 13-го авґуста 1924-го року і одслужыв Дяковный молебен на Мангаттенї, в Церькви Пречістой Дївы Марії.

Тоту сторочніцю теперь припомянуть собі в Церькви Пречістой Дївы Марії в Ню Йорку, котра была збудована пізнїше.

Памятна подїя буде проходити якраз 13-го авґуста 2024-го року, і почне семінаром, в рамках котрого отець Хрістофер Зуґґер – історік, буде говорити о приходї і ряджіню владыкы Такача у втогдышнїм нововыникнутім екзархатї.

Пак буде одслуженый, як перед сто роками, Дяковный молебен, котрый одправляти буде владыка Курт Бурнетт, єпарха в Пассаіку, вєдно з домашнїма священиками.

Петро МЕДВІДЬ, ЛЕМ.фм, языкова і ґрафічна управа: АРК в СР.