6. 8. 2025: В рамках проєкту з Ужгородом в Сабінові почали з діґіталізаціёв історічных обєктів
В Сабінові почали діґіталізацію выбраных історічных обєктів, котра має помочі заховати културну і історічну дїдовизну. Як інформовав аґентуру TASR коордінатор 3D мапованя міста Павол Ваврек, при обєктах проходить детайлне збераня даных в екстерьєрї і інтерьєрї, і то за помочі дронів, статічных 3D сканерів ці шпеціалных камер.
Припоминаме, же діґіталізація реалізує ся в рамках проґраму Interreg NEXT HUSKROUA, котрый заміряный є на меджіреґіоналну сполупрацу на пригранічній теріторії країн – Мадярьско, Словакія, Румунія і Україна. Предметом того проєкту є 3D мапованя, скенованя і фотоґраметрія выбраных обєктів у Сабінові і Ужгородї.
„Тоты технічны апараты докажуть створити точны хмары пунктів. Так выникать тридімензіоналный діґіталный одпечаток реалности з точностёв аж на міліметры,“ повів Ваврек.
В Сабінові заміряли ся на історічный центер міста, містьску дзвоніцю, історічны містьскы муры, Римокатолицькый костел святого Йоана Креститаля, Євангелицькый костел і Римокатолицькый костел Дівы Марії.
По діґіталізації в Сабінові буде робити ся тот процес в партнерьскім у тім проєктї містї – Ужгородї. Там ся буде діґіталізовати Ужгородьскый замок, котрый належыть меджі найнавщівлёванїшы памяткы і в котрым має свою експозіцію Закарпатьскый музей народной архітектуры і бываня.
Діґіталізація реалізує ся в рамках проєкту з назвов Діґіталны рїшіня про історічну дїдовизну міст Ужгород і Сабінїв, на котрый суть вырахованы кельчікы в сумі понад 332 тісяч вер, причім дашто высше 299 тісяч евр дала на проєкту як дотацію Европска унія.
Цїлём є захопити актуалный став архітекточных памяток до детайлного діґіталного запису, котрый буде служыти нелем на приправу проєктовой документації в припадї потребы реконштрукчных робот, але і як підклад про баданя ці віртуалны експозіції в будучности.
Резултатом буде колекція точных 3D моделїв у діґіталній подобі, включно фізічной макеты єдного з обєктів, маповых підкладів і технічных выступів, якы будуть доступны і посередництвом забезпеченых онлайн платформ ці різных маркетінґовых продуктів.
Петро МЕДВІДЬ, ЛЕМ.фм, языкова і ґрафічна управа: АРК СР.
Фото: Wikipedia/Йозеф Котуліч.
