7. 4. 2021: На Словакії ся самосписало 86 процент жытелїв. Продовжує асістоване списованя

До електронічного списованя жытелїв на Словакії ся найвеце людей запоїло такой в першый день. 15-го фебруара, коли списованя зачало, схосновало можливость самосписаня 651 162 жытелїв Словакії.

На пресконференції, котра одбыла ся у віторок, 6-го апріля 2021, о тім інформовали представителі Штатістічного уряду Словацькой републікы. За даныма, котры здобыли з електронічного списованя, ся самосписало 4 884 007 людей, што представлює 86 процент жытелїв Словакії.

Резултаты перекрочіли очекованя

Председа Шатітістічного уряду Александер Баллек підкреслив резултаты. За ёго словами перше електронічне списованя „перекрочіло очекованя“. Звернув при тім увагу, же штатісты очековали участь в онлайн списованю на уровни 70-ох процент.

Шеф Штатістічного уряду підчеркнув роботу і асістенцію самосправ, медій і вшыткых, котры на списованю сполупрацовали.

Директорка Секції соціалных штатістік і демоґрафії Штатістічного уряду а фахова ґарантка списованя Людміла Іванчікова звернула на пресконференції увагу на то, же денне середнє чісло людей, котры ся самосписали, было 95 тісяч.

За добрыма резултатами видить реално наставлену концепцію і выходовы пункты інтеґрованого списованя, і высшу міру помочі в родинах, де помагали старшым членам, котры не мають приступ ку онлайн формі списованя.

Подля часточных резултатів до списованя веце залучіли ся жены як мужи, актівніше было населіня в містах як на селах.

Выход чекать і на асістенцію

Найактівнішы были в електронічнім списованю в Жіліньскім краю, де ся самосписало 92 процент жытелїв.

На другім місцї є Тренчаньскый край із 90-ма процентами, пак іде Тырнавскый, Братїславскый, Нітраньскый і Баньскобыстріцькый край, котрый має 85-процентну участь на самосписованю.

Найгірше суть на тім краї на выходї Словакії. В Пряшівскім краю выповнило електронічный формуларь 83 процент жытелїв, найменше списаных было в Кошіцькім краю, де была участь лем 79 процент.

Електронічне списованя зачало 15-го фебруара і закінчіло ся 31-го марца 2021. Теперь продовжує асістоване списованя, котре мусить быти закінчене до 31-го октобра 2021. В самосправах буде асістоване списованя проходити шість тыжднїв і о термінах буде Штатістічный уряд допереду інформовати. Якраз в Пряшівскім і Кошіцькім самосправнім краю ся очекує, же чісла участных ся звекшать по асістованім списованю, кедьже на выходї Словакії є много сел, де є старше населїня, де не є інтернетова інфраштруктура, ці де суть марґіналізованы ромскы комуніты.

Першы оцїнкы резултатів бы мали быти публікованы кінцём календарьного року. Списованя жытелїв опередило списованя домів і квартелїв, котре проходило од 1-го юна 2020-го до 12-го фебруара 2021-го року.

Петро МЕДВІДЬ, ЛЕМ.фм, языкова і ґрафічна управа: ред. АРК в СР.