7. 6. 2016: Премії Літературного фонду про Мороховічову-Цвик і Коневала

14-го юна 2016-го року од 10.00 год. одбуде ся у Зічіго палацу на Вентурьскій ул. ч. 9 у Братїславі святочне передаваня Цїн і Премій словацького Літературного фонду (Literárny fond) за оріґіналну творчость за 2015-ый рік. Літературный фонд передавать і Цїну Александра Павловіча, котра належыть русиньскій літературї.

Премію Александра Павловіча одборна порота за 2015-ый рік удїлила двом русиньскым писателям. Єдна премія попутує Кветї Мороховічовій-Цвик (Квєта Галасова) за поетічну збірку Любовны періпетії, котра вышла в 2014-ім роцї і выдавателём быв Сполок русиньскых писателїв Словеньска. Павловічову премію здобыв і Миколай Коневал за збірку під назвов З русиньского сердця. Мої стишкы (2). Тота книжка была выдана Русиньсков обродов на Словеньску у 2015-ім роцї.

Літературный фонд удїлює од 2005-го року літературну Цїну Александра Павловіча за найлїпшый літературный твор написаный по русиньскы і Премію за літературный твор написаный по русиньскы і за тлумачіня літературного твору зо словацького на русиньскый язык. Цїны і Премії Александра Павловіча суть все удїлёваны творам, котры вышли у попереднїх двох роках. Цїну і Премії удїлює выбор Секції про оріґіналну літературу на пропозіцію пороты.

П. М.