7. 6. 2024: Переход Вубля – Малый Березный в обмедженім режімі

На гранічнім переходї Вубля – Малый Березный буде од понедїлька, 10-го юна 2024-го року, до одкликаня обмедженый режім. Як інформує аґентура TASR, причінов є реалізація робот, котры суть повязаны із запроваджінём Entry/Exit сістемы.

„Іде о нову цїлоевропску інформачну сістему зниманя біометрії твари і штирёх одпечаток перстів в припадї обчанів третїх країн, котров вычерять ся сучасне мануалне означованя паспортів печатков,“ повіла говоркыня Цолного уряду в Михалівцях Яна Німріхтерова.

Почас робот буде ход перерваный лем в єднім напрямі. Процес выбавлїня людей, котры хотять перейти граніцю в данім гранічнім переходї, буде одклоненый, і фунґуюча смуга драгы про вступ на теріторію Словацькой републікы і выступ із Словакії буде вызначена дочасным значінём.

„Шоферів, біціґлістів і пішых путуючіх жадаме о векшу увагу при переходжіню державной граніцї і дотримованя дочасного значіня, як і наряджінь членів фінанчной справы і поліції в службі,“ доповнила Німріхтерова.

З причіны реалізації споминаных робот може продовжыти ся час чеканя на гранічнім переходї з Українов.

Петро МЕДВІДЬ, ЛЕМ.фм. Ґрафічна і языкова управа: АРК в СР