7. 7. 2025: Русиньскый язык стане літурґічным языком

Рада єрархів ґрекокатолицкой церкви на Словеньску sui iuris доволила служіня св. Літурґіі по русиньскы од 1. авґуста 2025!

Є то далшый крок про актівне хоснованя нашого языка в Церкви.

Ознамлїня Рды єрархів о можности славіня Літурґії святого Яна Златоустого в русиньскім языку:

Дорогы священици, віруючі, братя і сестры!

По дакількорочнім намаганю і роботї літурнічной комісії передаєме Вам текст нашого отця Святого Яна Златоустого і в єй русиньскій верзії. Найкрасшый момент про чоловіка є, кедь може благословити Бога у своїм материньскім языку. Велика вдяка зато належыть перекладателям і їх сполупрацовникам, же ся з великов любовлёв і одборностёв поставили ку перекладу, абы досягли штонайкрасшый і найвірнїшый переклад. Хочеме тыж вказати на то, же візантійско-славяньска літурґія на нашій теріторії є барз узко споєный із церьковнославяньскым языком, котрый пережыв многы стороча як прямый одказ святых братів Кіріла і Мефодія.

Буде зато на священиках, парохах, жебы вєдно з віруючіма зважыли потребу, форму і розсяг служыти в тім новім перекладї.

Віриме, же ся то, подля слов святого Павла, зреалізує меджі Вами в любви. Русииньскый текст літурґії мож поужывати од 1. авґуста 2025. Най є пожегнаный Бог, най є пожегнана наша Церьков.

Жегнають Вам нашы єпіскопы.