8. 10. 2018: Штефан Штець іде на турне з дебутовым албумом

Співак русиньскых народных співанок, котрый лем недавно выдав свій дебутовый албум під назвов Полетів бы-м на край світа (оріґ. Poleťiv bym‘ na kraj svita), рихтує в новембрї 2018 своє перше турне. Співак обіцять, же на концертах одпрезентує співанкы, котры люде знають, но і цалком новы.

 

На коцертах чує енерґію

„Концерты мають про мене велике значіня. Стрїча із любителями на концертах мі приносить множество енерґії, котру маю намагу назад вернути при каждім выступлїню,“ говорить Штець. Подля ёго слов не є ніч красше, як аплавз і спокійна публіка. На концертах го тїшыть, же людём може передати дакус зо себе, своёй ідентіты і културы, котру здїдив, і о котру хоче подїлити ся.

„І кедь мі може не вшыткы розуміють што співам, знам, же мі розуміють іншыма чувствами. Хочу быти автентічный в тім, што роблю, і зато співам у своїм материньскім языку, значіть по русиньскы,“ говорить співак.

 

Народна музика і звізды

В рамках концертів буде выступати і Народна музика Горнад, котру веде Домінік Маніак. Музиканты на турне приготовили дакілько оріґіналных аранжманів. Як повів Маніак, іншпіровали ся традічнов народнов музиков, но заграють і іншы обробкы, котры пасують Штецёви, і на котрых робили цїлый рік.

На турне собі Штефан Штець закликав і звіздных гостїв. В Братїславі то буде хресна мати нового албуму, словацька композіторка Любиця Чековска, котра має так само русиньске походжіня. Вєдно із Штецём заграє дакілько русиньскых співанок, котрым Чековска зробила властны музичны обробкы. Выступати в Пряшові з ним буде Петер Бич із своїм Peter Bič Project.

 

Албум тримать собі першы місця

Штецїв дебутовый албум ся цїлый час тримать на першых місцях в рамках продайности на Словакії. Шумны реакції дебут здобывать нелем од Русинів, но і од людей з цїлой Словакії. В рамак трёх приготовлёваных концертів собі го любителї будуть годны выслухати нажыво.

Першый концерт в рамках Štefan Štec Poleťiv bym’ na kraj svita tour 2018 одбуде ся 6-го новембра 2018 в Пряшові, в кінї „Scala.‟ 10-го новембра буде мож Штеця відїти в Лученцї, де концерт привітать Tančiareň a pivovar Franz. Остатнїй оголешный концерт буде проходити в головнім містї Словакії, в клубі Ateliér Babylon 15-го новембра.

Тікеты на концерты мож купити на порталі Ticketportal.

Петро МЕДВІДЬ, лем. фм

Script logo