8. 10. 2021: Мілан ҐАЙ: Што бы нам повіли?, Русинам, Чекам на тя дома (Стихы)

Мілан Ґай

 

Што бы нам повіли?

Што бы сьте, дорогы,

на тото повіли,

кедь бы стали тоты,

што давно ту жыли?

 

Тоты, што померли

перед сто роками,

коли бідно жыли

дїти з родічами.

 

Наісто бы мали

радость превелику,

бо ту бы збачіли

ужасну техніку.

 

Авто, телевізор,

інтернет ці прачка,

то бы была про них

барз незнама грачка.

 

Може бы не знали

річі похопити,

котры полегчують

нам ту жывот жыти.

 

Істо бы не были

з того потїшены,

коли бы збачіли

лукы некошены.

 

Заморили мы ту вшытко

фляшкми од пласту,

воды, лїсы наоколо,

природу прекрасну.

 

Вырубаны лїсы

занедбаны поля,

вернути ся назад

была бы їх воля.

 

Русинам

Співам співаночкы

Русинам до світа,

жебы они жыли

на многая лїта.

 

Няй не буде ганьбов

русиньскы співати,

так як вас учіла

ваша родна мати.

 

Няй співанка летить

з горы на долину

і тїшыть Русинів

як єдну родину.

 

Про што нашы предкы

мусили вмерати?

Жебы мы в покою

могли нажывати.

 

Зрада то велика

у сердцї каждого,

хто своє охабить

тримле ся другого.

 

Прийде списованя,

на тото думайте,

русиньску народность

собі задавайте.

 

Коло списованя

бы сьте так думали,

з русиньской родины

боком не остали.

 

Бо на світї справна

є кажда родина,

котра выховала

вірного Русина.

 

Чекам на тя дома

Чекам на тя дома

з радостёв в тихотї,

коли прийдеш домів

по тяжкій роботї.

 

Новодоба доба,

што теперь настала

з нашых жен в роботї

отроків зїднала.

 

Роблять за мінімум,

так їх там здерають,

а подникателём

конта наростають.

 

Далшы ту чекають,

хотять наступити,

кедь ся вам не любить.

можете одыйти!

 

( З приправлёваной книжкы Мілана Ґая – Правдива выповідь.)