8. 3. 2025: Найцїннїшы експонаты русиньского музея здобудуть діґіталну подобу

Найцїннїшы експонаты Крайского музея в Пряшові і Словацького народного музея – Музея русиньской културы в Пряшові будуть здіґіталізованы. Інформує о тім Аґентура реґіоналного розвитку Пряшівского самосправного краю.

За помочі модерных технолоґій 3D сканованя будуть зроблены діґіталны копії, котры уможнять їх захованя про далшы ґенерації, і їх сприступнїня шырокій публіцї.

Експонаты будуть здіґіталізованы вдяка меджінародному проєкту на охрану културной дїдовизны Підкарпатя з назвов Віртуалны културны музеї, котрого партнером на словацькім боцї є Аґентура реґіоналного розвитку Пряшівского самосправного краю, і на україньскім боцї мімовладна орґанізація Лїпшый жывот.

Наскеновати бы ся мало довєдна 200 експонатів, із чого бы мали выникнути дві 3D переглядкы. Проєкт рахує і з тым, же ся купить професіоналный 3D скенер, а так само із школованём робітників музеїв, жебы по закінчіню проєкту годны были продовжовати в діґіталізації далшых експонатів.

Окрем 3D скенованя експонатів проєкт має в цїлях створїня онлайн жрідла, котре буде обсяговати 3D копії музейных єкспонатів, і 3D преглядкы музеїв із выкладачом на безплатне посмотрїня. Цїлём є помочі спропаґовати културну дїдовизну Підкарпатя і сприступнити єй людям із цїлого світа.

Меджінародный проєкт, до котрого залучены суть і два вызначны музеї на Підкарпатю, буде тырвати єден рік, аж до 20-го януара 2026-го року. Піде на нёго понад 172 тісяч евр і реалізує ся в рамках проґраму INTERREG VI-A NEXT Мадярьско-Словакія-Румунія-Україна 2021 – 2027.

Петро МЕДВІДЬ, ЛЕМ.фм, языкова і ґрафічна управа: АРК СР.