8. 9. 2025: Русинам на Словакії буде присвячена поштова знамка

На кінцю авґуста 2025-го року портал Поштовой філателістічной службы POFIS публіковав Емісный план словацькых поштовых знамок на 2026-ый рік. Документ одкликує ся на дві жрідла – Міністерство транспорту, будованя і реґіоналного розвитку Словацькой републікы і Словацьку пошту.

За даным документом в слїдуючім роцї выйде поштова знамка, котра буде присвячена Русинам на Словакії.

Выданя поштовой знамкы є наплановане на 13-го марца 2026-го року. Назва емісії є Народностны меншыны на Словакії: Русины на Словакії. Затля не є публіковане ани чісло емісії, ани форма друку, но номінална цїна знамкы є встановлена на 3 евра.

Як є звыком при выдаваню такых знамок, вєдно з тым буде в тот день выдана копертка і печатка. Вшыткы три бы мали мати ґрафіку повязану з темов. Цїна знамкы з копертков, на котрій є печатка ку дню выданя емісії є все высша.

Буде то першый раз, што Словацька пошта буде мати емісію знамкы присвяченой Русинам. В минулости были емісії, котры были повязаны з Русинами. Пошта выдала наприклад унамку з америцькым войновым героём русиньского походжіня Михалом Стренком, а так само знамку присвячену Памятнику 1-го Чехословацького армадного корпусу ґенерала Людвіка Свободы, в котрім боёвали і Русины.

Но теперь першый раз в історії буде емісія присвячена прямо третїй найвекшій народностній меншынї на Словакії.

За нашыма інформаціями іщі в минувшім роцї Інштітут русиньского языка і културы Пряшівской універзіты в Пряшові звернув ся до Словацькой пошты із жадостёв, жебы выдати поштову знамку в 2025-ім роцї, котра бы была присвячена 30-му юбілею кодіфікації русиньского языка на Словакії. Нажаль, до емісного плану на тот рік тота тема не дістала ся.

Наконець буде знамка выдана в слїдуючім роцї, а Словацька пошта мотівы, котры бы могли быти на поштовій знамцї, копертцї і печатцї, конзултовала із Словацькым народным музеём – Музеём русиньской културы в Пряшові. Потвердила то нашій редакції директорка музея Люба Кралёва. Но фінална верзія того, што на них будеме наконець відїти, зіставать затля таємніцёв.

Петро МЕДВІДЬ, ЛЕМ.фм, языкова і ґрафічна управа: АРК СР. Ілустрація: ChatGPT.