9. 10. 2024: На праздник Покровителькы Земпліна пришов мукачовскый єпарха

В недїлю, 6-го октобра 2024-го року. Ґрекокатолицька церьков на Словакії святковала Память чудотворной Клокочівской іконы Пресвятой Богородіції, Покровителькы Земпліна. Проґрам празднованя почав в клокочівскім храмі вже в суботу.

Як інформовав Пресовый центер Кошіцькой єпархії, торжественну архієрейску літурґію в недїлю одслужыв кір Теодор Мацапула, мукачовскый єпарха, вєдно з архієпіскопом Кірілом Василём – кошїцькым єпархом, владыком Міланом Хаутуром – емерітным кошіцькым єпархом, і духовенством.

Владыка Теодор в недїлю приговорив ся участным і в проповідї. До Клокочова пришов ку Клокочівскій Богородіцїі в слїдах своїх предків і попередника – владыкы Мілана Шашіка, котрый быв мукачовскым єпархом перед ним. Почас архієрейской літурґії співав катедралный хор із Ужгорода.

На кінцю владыка Кіріл Василь подяковав вшыткым присутным, но главно владыкови Теодорови, котрому подаровав панаґію з чудотворнов Клокочівсков іконов Пресвятой Богородіцї.

Праздник Покровителькы Земпліна

Праздник Покровителькы Земпліна быв установленый Декретом Конґреґації про восточны церькви (днесь Дікастерія про восточны церькви), выданым у Ватіканї 21-го децембра 2020-го року. Стало ся так на основі жадости втогдышнёго пряшівского архієпіскопа і митрополіты Йоана Бабяка і Рады єрархів Пряшівской митрополії при нагоді 350-ой рочніцї слызіня Клокочівской іконы.

Підпорены были жадостями пріматорів і містьскых заступительств вышнёго і нижнёго Земпліна, як і писмами Монс. Бернарда Бобера, кошіцького римокатолицького архієпіскопа-митрополіты, і владыкы Ґеорґія Страньского, православного архієпіскопа михалївско-кошіцького.

Клокочівску ікону Папа римскый Франціск 14-го септембра 2021-го року, по архієрейскій Літурґії св. Йоана Златоустого, котрой быв главным служытелём в Пряшові, торжественно коруновав.

Петро МЕДВІДЬ, ЛЕМ.фм, языкова і ґрафічна управа: АРК в СР.