9. 4. 2025: Ґрекокатолици із Словакії взяли участь на пути в Римі

В днях 3-го аж 6-го апріля 2025-го року одбыла ся Народна путь в Римі при нагоді Юбілейного року 2025. Понад 4 тісяч католицькых віруючіх із Словакії перешло юбілейныма бранами в штирёх папскых базиліках.

Меджі нима было і много ґрекокатоликів, котрых вели єрархы Ґрекокатолицькой церькви на Словакії вєдно із священиками.

На пути брав участь Высокопреосвященый Йона Максим, пряшівскый архієпіскоп і митрополіта, архієпіскоп Кіріл Василь, кошіцькый єпарха, і владыка Мілан Лах, помічный єпіскоп Братїславской єпархії.

В сполочнім проґрамі ґрекокатоликів і римокатоликів в рамках пути быв Акафіст ку Пресвятій Богородіцї, котрый в Базиліцї святой Пракседы 5-го апріля одслужыв кір Йона. В Базиліцї святого Клімента, де быв похованый святый Константін-Кіріл, і де доднесь суть ёго мощі, одзвучала і молитва Отче наш на церьковнославяньскім языку.

На недїлю, 6-го апріля 2025, коли святковала ся Пята недїля Великого посту, припав і праздник Преставленія отця нашого Мефодія, другого із братів- апостолів Славянів. В тот день кір Йона одслужыв архієрейску літурґію в Храмі святого Антонія при Папскій колеґії Руссикум в Римі. Проповідь на літурґії тримав архієпіскоп Кіріл Василь.

У 2025-ім році Католицька церьков святкує Святый рік. Юбілейный рік 2025 з моттом Путници надії, быв выголошеный булов Папы Римского Франціска, і є 27-ым рядным юбілейным роком в історії Католицькой церькви, другым в часї понтіфікату сучасного Вселеньского Архієрея.

Ґрекокатолицька церьков на Словакії в рамках Юбілейного року 2025 має наплановану іщі окрему путь про ґрекокатоликів, котра одбуде ся в днях 24-го аж 27-го октобра 2025. Вєдно з віруючіма знова підуть до Рима єпіскопи той церькви sui iuris.

Петро МЕДВІДЬ, ЛЕМ.фм, языкова і ґрафічна управа: АРК СР.