9. 4. 2026: Вышла нова Історія Підкарпатьской Руси

Недавно на чеськый і словацькый книжковый ярмарок дістала ся нова чеськоязычна публікація чеського історіка Яна Ріхліка під назвов Історія Підкарпатьской Руси (оріґ. Jan Rychlík: Dějiny Podkarpatské Rusi). Ріхлік не інтересує ся темов Підкарпатьской Руси першый раз, но в новій книжцї слїдує тоту теріторію од найстаршых часів і першых населїнь, аж по найновішу історію, включно такых дїй, як Евромайдан 2014-го року.

Нова 360-сторінкова публікація Яна Ріхліка на першый погляд дає чітателям комплетный перегляд історії теріторії, котру называме Підкарпатьска Русь. Чітатель може познакомити ся із Підкарпатём за влады Арпадовых, дочітать ся о повстаню Ракоція, періодї русиньского возроджіня, чехословацькій історії того краю, о совєтьскім періодї ітд. Так само мож повісти, же чеськый історік приступать ку темі серёзно, обєктівно, хоснує много жрідел, історічны матеріалы, выходить, меджі іншыма, із такых в русиньскім середовиску вызначных  авторів, як Антоній Годинка, Павел Роберт Маґочій ці Іван Поп.

Но предсі дакус на шкоду книгы є, же період по 1989-ім роцї, значіть по політічных змінах, розпадї Совєтьского союзу і выголошіню незалежной Україны, дістав у новій публікації простор лем на коло двадцять сторінок. Кедь сьме дакус крітічны односно того, же періоду по 1989-ім роцї є даного в публікації мало простору, треба повісти і то, же наперек тому Ян Ріхлік тот період описує доста обєктівно, а іде по темі і в шыршім контекстї.

В книзї Яна Ріхліка дочітаме ся нелем о возроднім русиньскім русї на Підкарпатю на початку 1990-ых років, о ёго проблемах і фактї неузнаня Русинів на Українї до днешнёго дня, што автор акцентує. Ріхлік русиньскый возродный рух рїшыть в шыршім контекстї, вказує на ёго успіхы в іншых державах – наприклад на Словакії а в Польщі, а споминать і меджінародне дїяня, наприклад в рамках Світового конґресу Русинів.

Книга Історія Підкарпатьской Руси Яна Ріхліка є істо добрым вкладом до баданя історії того краю, але і історії карпатьскых Русинів, про котрых турбулентный період 20-го столїтя головно на Підкарпатьскій Руси позначів цїле наше бытя, і ёго наслїдкы несуть Русины доднесь.

Выбране і скорочене зо статї Мґр. Петра МЕДВІДЯ, ЛЕМ.фм. Ґрафічна і языкова управа: АРК в СР.