9. 5. 2024: Новым мукачовскым єпархом став Теодор Мацапула

Як оголосив Святїшый Престол на своїм офіціалнім вебсайтї, в середу, 8-го мая 2024-го року, Папа римскый Франціск призначів нового єпіскопа-ордінарія Мукачовской ґрекокатолицькой єпархії. Став ним отець Теодор Мацапула, дотеперїшнїй сінкел в справах монашества Мукачовской ґрекокатолицькой єпархії.

Теодор Мацапула так само дотеперь быв іґуменом чернечого общества блаженого Теодора Ромжы Інштітуту Воплоченого Слова в Дубовім, Тячовского раёну.

Владыка Ніл Лущак, дотеперїшнїй апостольскый адміністратор єпархії, зіставать помічным єпіскопом. Владыка Ніл рядив єпархію од 20-го юла 2020-го року як апостольскый адміністратор ad nutum Sanctae Sedis (до одкликаня Святїшым Престолом). На тоту функцію быв призначеный по смерти попереднёго єпархы – владыкы Міланa Шашіка. Перед тым быв у функції помічного єпіскопа єпархії.

Владыка-номінант Теодор Мацапула народив ся 21-го авґуста 1981-го року в Крилосї, Івано-Франківской области. У 2001-ім роцї вступив до новіціату Інштітуту Воплоченого Слова (Istituto del Verbo Incarnato – IVE). Штудовав на Меджінародній семінарії Сан Віталіано в італійскім містї Сені, і в Центрї высшых штудій святого Бруна.

У 2007-ім роцї склав вічны обіты. 10-го фебруара 2008-го року быв рукоположеный на священика. Од 2008-го до 2013-го року быв на місії в Росії, де старав ся о католиків візантійского обряду. Служыв у містї Омск на Парохії Покровы Пресвятой Богородіцї, в містї Сарґатьске на Парохії св. Кіріла і Мефодія. Так само служыв ґрекокатоликам у містах Хабаровск і Владивосток.

В роках 2009 аж 2013 быв єпіскопом Йосифом Вертом призначеный выконовати обовязкы декана про католиків візантійского обряду на теріторії, яка є згодна з Римокатольцков дієцезов святого Йосифа в Іркутьску на Далекім Востоцї.

Од 2013-го року служыть в Мукачовскій ґрекокатолицькій єпархії. В роках 2013 аж 2019 быв протоіґуменом тогдышнёй Делеґатуры Зарваницькой Матери Божой на Українї. Сінкелом в справах монашества быв од 2017-го року.

У 2018-ім роцї здобыв тітул бакаларя гуманітных наук, у 2022-ім роцї здобыв ліценціат посторалного богословя. Бісїдує по італійскы, іспаньскы, польскы і російскы.

„Хотїв бы єм повісти, жебы сьте ся не засмучовали про мою любов до Мукачовской єпархії. Я єй досправды люблю. І Господь Бог мене покликав, жебы єм робив вшытко про їй добро,“ повів новопризначеный владыка у куртім приговорї, котрый мав у Хрестовоздвиженьскім катедралнім соборї в Ужгородї по офіціалнім публікованю інформації о новім мукачовскім єпархови.

Новпопризначеный єпарха є першым владыком на світї, котрый походить із Інштітуту Воплоченого Слова.

Петро МЕДВІДЬ, ЛЕМ.фм, Языкова і ґрафічна управа: АРК в СР.