9. 6. 2025: Комісія выбрала за нового директора ПУЛС Віліама Микулу

Микула веде ПУЛС од януара.

27-го мая 2025-го року в просторах Засідальнї Пряшівского самосправного краю (ПСК) проходило публічне выслуханя кандідатів на директора професіоналного русиньского ансамблю – Піддукляньского умелецького людового субору (ПУЛС).

Веджінём ПУЛС од януара того року быв дочасно повіреный Віліам Микула, кедьже ку кінцю 2024-го року одышов до пензії бывшый директор Юрай Швантнер. Якраз Микулу выбрала  комісія по публічнім выслуханю спомеджі штирёх кандідатів.

Выберали із штирёх

Выберова комісія, котру скликав ПСК як зряджователь, мала сім членів. В складї комісії были посланцї Заступительства Пряшівского самосправного краю Вєра Лещакова, котра є і предсидательков Комісії културы і народностных меншын ПСК, Мірослав Бенко, Михал Ільканин і Павел Гадярі.

В комісії была і Емілія Антоликова, котра є ведучов Оддїлїня културы ПСК, далше фолклоріста і бывшый шеф балету Словацького народного театру в Братїславі Еміл Томаш Бартко за одборників, і Мартіна Світкова, котра репрезентовала робітників ПУЛС.

Перед комісію поставили ся штирми кандідаты. Бывша членка-танечнічка ПУЛС Сілвія Кравцова, Віліам Микула, бывшый член-танечник Мірослав Мороховіч, і Ян Штовка, котрый в минулости быв прімашом в орхестрї ПУЛС.

Каждый кандідат мав десять минут на презентацію свого проєкту, што до розвитку ПУЛС. Пак было про каждого кандідата выдїленых далшых 30 минут, в рамках котрых доповнюючі вопросы могли давати членове комісії, а пак і публіка, котра пришла на тото выслуханя.

По тім, што одпрезентовали і на звіданя одповіли вшыткы кандідуючі, комісія інформовала, же резултаты будуть выголошены до десятёх днїв. Подля нашых інформацій днесь было потверджене, же комісія схвалила до функції нового директора ПУЛС Віліама Микулу. Того бы іщі у функції мало потвердити Заступительство Пряшівского самосправного краю на своїм найблизшым засїданю, но мала бы то быти уж лем формалне дїло.

Новы представлїня і сполупраці

Што презентовав кандідат, котрого выбрала комісія? Віліам Микула, котрый є 14 років членом ПУЛС, і перешов різныма позіціями – член балету, асістент, хореоґраф, режісер, повіреный директор, такой на початку презентації свого проєкту підкреслив, же ансамбель є выставный артікел Пряшівского самосправного краю, а хоче го рядити як амбіціозный професіоналный ансамбель, котрый репрезентує традіції Русинів. У своїм проєктї заміряв ся на пять пріоріт.

Микула в рамках першой пріоріты говорив о економічных дїлах і господарїню. Окрем того, же має ансамбель свій бюджет із ПСК, а так само має ґрантовы грошы з Фонду на підпору културы народностных меншын, Микула хоче глядати і далшых спонзорів, підтримователїв, жебы мав ПУЛС міморозрахункове дофінанцованя.

Говорив і о інвестічных замірах, наприклад о потребі обновы балетной салы, котра є в крітічнім ставі, о інвестіціях до костімів, сценоґрафії, выдаваня новых ЦД ці стріміґновых служеб, де бы ся могли обявити награня ПУЛС.

Друга пріоріта Микулы є заміряна на драматурґію і умелецьке лице ансамблю. Выбратый кандідат хоче одбуряти академічность, хоче векшу істинность до творчости з оглядом на сценічный фолклорізм, а так само хоче обявлёвати новы приступы.

В найблизшім часї хоче рихтовати ґалапроґрам, котрый буде присвяченый 70-ій рочніцї выникнутя Піддукляньского умелецького людового субору, а в 2026-ім роцї бы хотів зробити і заяздовый проґрам, в котрім буде менша міра штілізації, а главно, котрый буде на менше танечників, жебы могли з ансамблём іти і на такы села, котры не мають великы сцены в културных домах, і не мож там грати великы представлїня.

Микула так само хоче зробити новый проґрам, в котрім буде представленых 7 европскых країн, в котрых історічно жыють Русины, ці проґрам о русиньскых збойниках і волошскій културї. В непослїднім шорї хоче ансамбель знова дістати веце і ку школьскій публіцї, про котру хоче в ПУЛС зробити окрему інсценацію.

Меджі пріорітами была і нова маркетінґова стратеґія. Микула хоче, жебы ся веце презентовати в медіях, орґанізовати днї отвореных дверей ці курзы народного танця про людей.

Выбрантый кандідат мав як четверту пріоріту сполупрацу з іншыма орґанізаціями в рамках ПСК, русиньскыма орґнізаціями, ерудованыма фахманам. Сполупрацу хоче мати на офіціалній уровни з конзерваторіёв, котра є в Пряшові, ці далшыма професіоналныма тїлесами як є Slovenský umelecký ľudový kolektív (SĽUK) з Братїславы, ці мадярьскый професіоналный танечный театер Ifjú Szivek.

Послїднёв пріорітов про Микулу є фунґуюча орґанізачна штруктура – підниманя цілковой якости ансамблю з персоналного і орґанізачного боку.

ПУЛС іде до Осакы

Віліам Микула почас вопросів поінформовав і о діпломатічнім успіху, котрый ся му подарив за нецїлый піврок, што є повіреный веджінём. Русиньскый професіоналный колектів ся в септембрі того року одпрезентує на світовій выставі EXPO, котра тот рік проходить в японьскім місті Осака.

ПУЛС буде головный пункт проґраму в рамках презентації Словацькой републікы на тій выставі. Ансамбель так по десятках років надвяже на меджінародны успіхы і выступлїня, з тым, же до Осакы не іде лем часть членів, але цїлый колектів.

ПУЛС, котрый быв у минулости балетом і оперетов Театру Александра Духновіча (ТАД), і оддїлив ся в роцї 2008, не сполупрацовав одвтогды із своёв попереднёв домашнёв сценов. Микула ся ку вопросу сполупраці з ТАД поставив позітівно, кедь на звіданя одповів, же о тім думать уж довшый час. Покля буде умелецька путь, жебы тоты тїлеса співпрацовали, є тому наклоненый.

Віліам Микула

Віліам Микула (1991 р., Пряшів) є хореоґраф, режісер, танечник і педаґоґ. Абсолововав хореоґрафію на Музичній і танечній факултї Высокой школы музичных умень в Братїславі. В ПУЛС є 14 років. Як педаґоґ дїяв на умелецькій школї, в дїтьскых і дорослых фолклорных ансамблях ці на конзерваторії. В ПУЛС-і так само быв ведучім балету і педаґоґом.

Заміряный є главно на хореоґрафію. Своёв творчостёв записав ся до професіоналных умелецькых тїлес і в загранічну, іде о Заслуженый академічный Закарпатьскый народный хор в Ужгородї і Воєньскый умелецькый колектів Ондраш в Бырнї. Сполупрацовав на дакільло інсценаціях із Спішскым театром в Спішскій Новій Всі, а главно з Театром Йонаша Заборьского в Пряшові, в котрім робив на великых музикалах.

Найвекшу часть своёй творчости лишыв у ПУЛС-і, де вытворив десяткы хореоґрафій і штири цїловечурны представлїня.

Его творчость до великой міры має опору в традічній културї. Робить із нёв у автентічній формі, посувать єй так само до высшых штілізацій і танечного театру, але все з почливостёв, решпектом до нёй.

Петро МЕДВІДЬ, ЛЕМ.фм, языкова і ґрафічна управа: АРК СР.