9. 7. 2021: Ожывлены ремесла і тот рік в гуменьскім сканзенї

Музейны неділї пропонують зажыток з традіціями, фолклором і креатівітов про цїлу родину

Вігорлатьскый музей в Гуменнім і реґіоналны носителї традічной културы вышнього Земпліна одкрывають в роцї 2021 про родины і любителїв традіцій і фолклору продовжіня великого вакаційного проґраму спознаваня ожывлёваня традічных ремесел.

Як інформовала Яна Федічова із гуменьского музея, музейный лїтнїй зажытковый проєкт під назвов Цікл творчіх варштатів традічных ремесел про верейность – Ожывлены ремесла ІІ проходить і тот рік в Експозіції народной архітектурї і бываня (сканзенї) Вігорлатьского музея. Ожывлены ремесла будуть в Гуменнім почас пятёх недїль.

Почас двох юловых і трёх авґустовых недїль буде мож відїти і приучіти ся такым ремеслам як гончарьство, ремінярьство, ковальство, ткачство, корытарьство, шындлярьство ці роботї зо соломов. Кажда недїля буде мати і свій супроводный проґрам.

Неодїлительносв частёв лїтнёго ремеселного проґраму є і то, же собі люде будуть годны посмотрити сканзен і окремы ремеселны майстернї, котры в сканзенї доповнюють колекцію шістьнадцятёх історічных обєктів народной архітектуры бываня, народной господарьской і сакралной архітектуры выходокарпатьского реґіону.

Перша ремеселна недїля буде проходити вже 11-го юла, остатнёв бы мала быти недїля 22-го авґуста. Орґанізаторы звертають увагу на то, же проґрам буде ся рядити подля актуалных епідемічных наряджінь, котры будуть прияты про окрес Гуменне.

Петро МЕДВІДЬ, ЛЕМ.фм, ґрафічна і языкіова управа: ред. АРК в СР. Жрідло

фотоґрафії: www.muzeumhumenne.sk/skanzen.html.