9. 9. 2025: В Новоселіцї одкрыли ареал енвіроменталной выховы

В русиньскій Новоселіцї, Сниньского окресу, 6-го септембра 2025-го року одкрывали новый Енвіроцентер. Новый Ареал енвіроменталной выховы має помочі селу схосновати свій потенціал наповно.

Як інформовала аґентура TASR, село подля старосты Василя Дініча находить ся прямо в Народнім парку Полониныі, і своїм положінём має ідеалны обставины стати освітнёв дестінаціёв, де будуть годны навщівници спознавати природу і навчіти ся, як єй хранити.

Проєкт Новоселіця фінанцовала із Плану обновы, самосправа на нёго здобыла 1,7 міліона евр.

„Новоселіця є вступнов бранов до Народного парку Полонины, і зато мы вырїшыли тот потенціал наповно схосновати. Выбудованя ареалу нам поможе нелем звекшыти чісло навщівників у реґіонї, але і помочі в области енвіроменталной освіты, котра буде на хосен про школы і шырокый округ людей,“ повів Дініч.

В рамках ареалу є Інформачный центер в зреконштруованім Домі културы, де навщівници здобудуть інформації о околіцї, природї і охранї жывотного оточіня. Будова служыть і як мултіфункчный простор на орґанізованя освітнїх і културных подїй. Ареал енвіроменталной выховы продовжує в екстерьєрї, де суть різны елементы на граня про дїти, научна стежка ці меншый амфітеатер. В рамках проєкту зробила ся і оцелёва лавка через ріку Збой.

На отворїня Новоселіця порихтовала і културный проґрам, в котрім выступали фолклорны ансамблї, музиканты, про дїти были приготовлены гры і змаганя, промітали ся філмы, але мож было абсолвовати і коментовану переглядку ареалу.

Петро МЕДВІДЬ, ЛЕМ.фм, языкова і ґрафічна управа: АРК СР.