1. 10. 2021: Комунікат ведучых Стоваришыня «Руска Бурса» та Стоваришыня Лемків

Ведучы Стоваришыня «Руска Бурса» в Ґорлицях та Стоваришыня Лемків в справі закінчыня Нацийонального Повселюдного Списуваня Жытелів і Мешкань 2021. Дня 30. вересня закінчыло ся Нацийональне Повселюдне Списуваня Жытелів і Мешкань 2021. Дякуєме вшыткым, котры при списуваню думали на тото, што лемківска нацийональніст є частю іх ідентичности і дополнює ріжнорідніст Польщы.

Віриме, што до лемківской нацийональности приголосило ся векше чысло осіб як в остатнім списуваню, якє проходило десят років тому. Ціла бо декада несла ся в позитивній енерґіі i безперерывній роботі представників інституций, орґанізаций, стоваришынь ци волонтерів.

Завершыньом вшыткых діянь была загальнорусиньска кампанія Сме Русины / Сме Лемкы. В Польщы провели сме ріжны онляйновы i офляйновы активности. Через социяльны сіти дотерли сме до соток тисячів осіб, зрыхтували сме і емітували пару місяців радийоспоты, презентували в інтернеті відеоспоты, наша друкувана преса была означана візуальом кампаніі, по селах розвісили сме плякаты, роздали летучкы, розмістили великоформатовы банеры, публикували сме популяризаторскы статі, спілтворили сме офіцияльны інформацийны материялы реализуваны Головным Статистичным Урядом в Польщы. Заохочали, припоминали, усвідомляли сме, што СМЕ.

Великым і в істориі Русинів вынятковым успіхом было тото, што до заініциюваной Русинами на Словациі соспільной кампаніі Сме Русины прилучыли ся окрем Лемків в Польщы, Русины в Чехах, Сербіі, Хорвациі і в Румуніі. Схоснуваня єдного візуального концепту і слоґану підкрислило важніст спілпрацы Русинів жыючых в ріжных енклявах в рамках держав Европы.

Дякуєме вшыткым, котры допомогли в реализациі кампаніі. І хоц бы не принесла она вымрияных статистичных показників, то принесла нам знаня, што спілпраца приносит долгодобовы і вымірны результаты.

 

Наталія Малецка-Новак

Ведуча Заряду Стоваришыня «Руска Бурса» в Ґорлицях

Андрий Копча

Ведучый Головного Заряду Стоваришыня Лемків