1. 3. 2023: Новосільскій серед краківскых грекокатоликів. Лишыл по собі іконостaс

Юрий Новосільскій такой ціле своє жытя звязаный был з Краковом. Тото тіж сприяло утримуваню стислых контактів з місцевыма грекокатоликами і православныма.

Новосільскій, як грекокатолик по роді, был присутный в жытю краківской грекокатолицкой парохіі Воздвижыня Честного Креста – і то в тых найтяжшых моментах, коли церков офіцияльно не могла істнувати. Як раз подія, яка прошла 25. лютого/фебруара тр., была нагодом, жебы познати ближе звязкы Новосільского з краківскыма грекокатоликами, як і саму його участ в єй істориі.

В тот ден до краківской церкви прибыл архієпископ Євген (Попович), митрополита перемышльско-варшавской архієпархіі УГКЦ в Польщы. Медже інчыма одбыло ся посвячыня одновленой бічной каплиці святыні, в якій містит ся давный іконостас авторства Новосільского, а при тым і інчы його іконы.

Участ в архієрейскій літургіі взяло дакілько дальшых священників. Владыка в своій проповіди однюс ся до трьох подій, якы будут одзначены в тым році краківском парохійом Воздвижыня Честного Креста.

Окрем річниці народжыня Юрия Новосільского, краківскы грекокатоликы одзначают і 30. річницю повороту в порогы свого храму, якій по 1947 р. на фоні Акциі «Вісла» был забраный громаді і переданый до хоснуваня римокатоликам. Третьом з річниц єст 50. річниця народжыня теперішнього пароха, о. Петра Павлище.

Подля слів єрархы, краківска церков є выняткова як раз з той причыны, што містит два іконостасы двох вызначных артистів.

Єден з них то спомянутый іконостас Новосільского, якій был выконаный на зламі 60. і 70. років ХХ ст. первістно до єдной з бічных каплиц костела св. Катажыны в Кракові, де молили ся товдышні грекокатолицкы вірны. Пак, коли вірны одзыскали храм при ул. Вісльній 11, іконостас забрали зо собом. Тепер нашол він місце в новоосвяченій каплици, яку прикрашат вєдно з інчыма іконами, што вышли спід рукы Новосільского. Другій іконостас (головный), з кінця ХІХ ст., был запроєктуваный Тадеушом Стриєньскым, але проєкт ікон до него зробил сам Ян Матейко (іконы написал його ученик Владислав Россовскій).

Слово мала запрошена на подію др Кристина Черні, біоґрафка Юрия Новосільского. По богослужыню владыка освятил бічну каплицю, яка одтепер буде припоминала не лем о самым Новосільскым, але і о істориі краківскых грекокатоликів. А сам артиста з краківском церквом на Вісльній звязаный был такой од свого початку – был в ній крещеный в 1923 р.

Севериян КОСОВСКЫЙ, ЛЕМ.фм.

(Публікуєме в оріґіналї – лемківскім варіантї русиньского языка.)