1. 4. 2022: Підкарпатя на знимках Рудолфа Гулкы онлайн
Майже 600 знимок Рудолфа Гулкы є теперь онлайн приступных.
Як інфомровала 30-го марца 2022-го року Славяньска бібліотека в Празї, інштітуація сприступнила вшыткы выбраны фотоґрафії і фотоґрафічны колекції Рудолфа Гулкы, котры зробив на Підкарпатьскій Руси.
Знимкы суть із першой половины 1920-ых років, коли Гулка в найвыходнїшій части втогдышнёй Чехословакії робив. Славяньска бібліотека сприступнила цїлково 593 фотоґрафій і суть на порталі, котрый справує Народный музей в Празї за тым мотузком.
Підкарпатьска Русь Рудолфа Гулкы
Рудолф Гулка (рр. 1887 – 1961) быв любителём фотоґрафії, іншак професіёв урядник а пізнїше і тлумач літературы. Підкарпатя фотив у першій половині 20-ых років ХХ. столїтя, коли там робив урядника.
Ёго фаребны, дофарблёваны і чорнобілы фотоґрафії вказуюзь штоденный жывот, роботу селянів і жытелїв міст, їх традіції, архітектуру, промысловы будовы, природны мотівы ці ремеселны выробкы. Гулка фотив так русиньскых жытелїв Підкарпатьской Руси, котры творили маёрітне населїня, як і далшых жытелїв – Жыдів, Ромів, Мадярів, якы вєдно з Русинами жыли на тій теріторії.
На фотоґрафіях мож відїти складны соціалны условії Підкарпатя, котре было за Астро-Угорьской імперії єдным із найменше розвитых реґіонів, як і то, же Чехословакія такой по вытворїню републікы зачала актівно інвестовати до реґіону і злїпшовати условії про жывот підкарпатьскых жытелїв. Векшына з того, што творило унікатну атмофсферу русиньского Підкарпатя, счезла по анексії теріторії Совєтьскім союзом.
Фотоґрафії Рудолфа Гулкы были выданы і книжно у 2014-ім роцї (друге выданя р. 2016). Книжку приготовили Гана Оплештілова і Лукаш Бабка. Двоязычня чесько-анґліцька публікація вышла під назвов Zmizelý svět Podkarpatské Rusi ve fotografiích Rudolfa Hůlky (1887-1961) / The Lost World of Subcarpathian Rus’ in the Photographs od Rudolf Hůlka (1887-1961) (Счезлый світ Підкарпатьской Руси на фотоґрафіях Рудолфа Гулкы). Выдала єй Народна бібліотека Чеськой републікы – Славяньска бібліотека.
Славяньска бібліотека
Славяньска бібліотека є публічно приступна шпеціалізована наукова бібліотека про область славістікы, належыть меджі найвекшы і найвызначнішы славістічны бібліотекы в Европі. Была основана у 1924-ім році, одвтогды сістематічно доповнює, обраблять, тырвало всокочує і сприступнює фонд світовой славістічной літературы, главно історічной, філолоґічной і політолоґічной, а так само выбрану оріґіналну творчость славяньскых народів.
Петро МЕДВІДЬ, ЛЕМ.фм. Ґрафічна і языкова управа: ред. АРК в СР. Жрідло фотоґрафії: Národní knihovna České republiky – Slovanská knihovna.
