1. 4.2023: Kардінал Кох стрїтив ся з ґрекокатоликами і православныма. Оцїнили го медайлов Пряшівской універзіты
Векшыну часу навщівы быв на выходї Словакії.
В днях 28-го аж 30-го марца 2023-го року на Словакії на навщіві быв префект Дікастерії на підпору єдности хрістіанів, кардінал Курт Кох. Кардінал навщівив Кошіцї, Михалївцї, Пряшів, а остатній день бв у століцї державы – Братїславі.
Навщівив Михалївцї і Клокочів
Проґрам кардінала Коха зачав у віторок на выходї Словакії. 28-го марца абсолвовав стрїчу з представителями Михалївско-кошіцькой православной єпархії. Префект дікастерії посмотрив собі і Катедралный собор святых Кіріла і Мефодія в Михалїцях.
В тот день завітав і до ґрекокатолицького путницького центра в Клокочові, де молив ся перед Іконов клокочівской Богородіцї.
Пополудне одышов до Кошіць, де помострив собі Музей жертв комунізму, стрїтив ся з представителями міста і кошіцькой екумены, посмотрив собі вєдно з кошіцькыма римокатолицькыма єпіскопами Катедралу святой Єлизаветы.
Вечур в ґрекокатолицькім Катедралнім соборі Рождества Пресвятой Богородіцї быв участный на екуменічнім концертї, котрый орґанізовав ся з нагоды ёго навщівы.
Оцїненый медайлов
В середу Кардінал Кох пришов до Пряшова, де го дополудне прияв на Ґрекокатолицькім архієпіскопскім урядї владыка Петро Руснак, апостольскый адміністратор Пряшівской архієпархії.
Вєдно з кошіцькым єпархом, владыком Кірілом Василём, і помічным братїславкым єпіскопом, владыком Міланом Лахом, посмотрив собі експозіцію о історії Ґрекокатолицькой церькви, котра є в просторах архієпіскопской резіденції, як і Катедралный собор святого Йоана Крестителя, де поклонив ся мощам блаженых священомучеників, єпіскопів Павла Петра Ґойдіча і Василя Гопка.
Пак кардінала прияв декан Ґрекокатолицькой теолоґічной факулты Пряшівской універзіты Петро Штурак, де была кардіналови удїлена Памятна медайла Пряшівской універзіты. Авдіторія могла в просторах факулты выслухати лекцію префекта дікастерії на тему Можность єдности в тайнах меджі католиками і православныма.
Пополудне кардінал навщівив православного пряшівского архієпіскопа і метрополіту чеськых країн і Словакії – Його Блаженость Ростислава.
Остатнїй день быв у Братїславі
Триднёвый проґрам кардінала Коха завершыть ся в четверь в Братїславі. При нагодї недавного 35-го юбілею Свічковой маніфестації положыть вінець при памятнику на Гвієздославовій площі. В століцї ся стрїтив і з Екуменічнов радов церьквей, а быв гостём сімпозіюма з назвов Меджіреліґійный діалоґ, завершіня 7-ох років меджіреліґійного діалоґу меджі жыдївсков і католицьков комунітов.
Петро МЕДВІДЬ, ЛЕМ. фм, языкова і ґрафічна управа: АРК в СР.