1. 6. 2022: Меншыны в Сербії обговорили списованя жытелїв. Меншыновы вольбы будуть пізнїше
Меншыновы выборы мали быти в новембрі того року.
Як інформовала аґентура Рутенпрес, 27-го мая 2022-го року одбыла ся в Палаці Сербії в Белеградї стрча Коордінації Націоналных совітів, котру вів Борче Величковіч, председа Націоналного совіту Македоньцїв.
На стїрічі брали участь представителї вшыткых у Сербії признаных народностных меншын. За Русинів быв участный Борислав Сакач, председа Націоналного совіту Русинів. Найважнїшым пунктом проґраму было списованя жытелїв, котре буде проходити в Сербії аж тот рік в осени, кедьже было перенесене з причіны пандемії.
Меншыны ся боять резултатів головно в діаспорі
На стрїчі были і представителї Републікового штатістічного уряду, котры представителїв меншын інформовали о детайлах списованя, наприклад, якы формуларї ся будуть в рамках списованя в октобрї выповняти.
Штатістічный уряд вєдно і Міністерством про людьскы і меншыновы права зрядив іщі перед тым робочу ґрупу, в котрій мали своїх людей і націоналны совіты за окремы меншныы, і з котрыма ся радили, як буде вызерати списованя, главно тота часть, яка односить ся ку меншынам.
Як аґентура інформує, Націоналны совіты боять ся, же членів народностных меншын буде менше як при остатнїм списованю, і хоць было пропоноване і електронічне списованя, вшыткы мають страх з того, як ся буде записовати діаспора. Припоминаме, же Сербія довгодобо терпить міґраціёв своїх обчанів за роботов до іншых держав, што може неґатівно овпливнити штатістічны даны і у меншын.
Меншыновы выборы ся перенесуть на пізнїше
В тот самый день засїдав і Републіковый совіт про народностны меншыны. Стрїча проходила на Урядї влады і вела єй предсидателька влады Сербії Анна Бырнабіч вєдно із міністерков про людьскы і меншыновы права Ґорданов Чоміч. На тій стрїчі было участных вшыткых 22 націоналных совітів і жыдівска общіна.
Премєрка Бырнабіч представила дакілько актінвостей, котры суть важныма в слїдуючім періодї про націоналны совіты. Припомянула, же в юни буде закінчене творіня Акчного плану про творіня прав народностных меншын. Іде о документ, котрый підтримала Европска унія і Рада Европы, а давать Сербію до позіції країны, котра в повности припознавать права народностных меншын.
На обидвох стрїчах была участна і державный секретарь Міністерства про людьскы і меншыновы права Олена Папуґа.
На Републіковім совітї про народностны меншыны обговорила ся і тема перенесїня выборів до націоналных совітів на пізнїшый термін. Вольбы мали быти в новембрї, лемже іщі лем в октобрї буде проходити списованя. Покля бы ся вольбы не перенсели на пізнїшый датум, мусили бы проходити дві про меншыны важны кампанї в єднакім часї.
Новый термін волеб не быв іщі становленый, кедьже то мусить быти одконзултоване і в згодї з односным законом.
Петро МЕДВІДЬ, ЛЕМ.фм. Ґрафічна і языкова управа: ред. АРК в СР.
